Մարդկային սխալը՝ աղետի պատճառ. Իրանը պաշտոնապես ընդունել է ինքնաթիռի խոցման իր մեղավորությունը

Թեհրանի մոտ ուկրաինական Boeing-ի կործանման պատճառը մարդկային սխալն էր ճգնաժամի ժամանակ՝ ԱՄՆ «արկածախնդրությամբ» պայմանավորված. թվիթերի իր միկրոբլոգում գրել է Իրանի ԱԳՆ ղեկավար Մոհամադ Ջավադ Զարիֆը։

«Տխուր օր է։ Հրապարակվել է Զինված ուժերի ներքին հետաքննության նախնական եզրակացությունը. ԱՄՆ արկածախնդրությամբ պայմանավորված ճգնաժամի պահին մարդկային սխալը աղետի պատճառ դարձավ։ Մենք խորապես ցավում ենք, ներողություն ենք խնդրում  ու ցավակցում ենք մեր ժողովրդին, բոլոր զոհերի ընտանիքներին և տուժած  մյուս պետություններին»,- գրել է Իրանի ԱԳ նախարարը։

Իսկ Իրանի նախագահ Հասան Ռոհանին իր ցավակցական խոսքում ասել է. «Գեներալ Ղասեմ Սոլեյմանիի նահատակվելուց հետո, ամերիկյան ագրեսոր ռեժիմի կողմից սպառնալիքների և իրանցի ժողովրդին ահաբեկելու պայմաններում Միացյալ Նահանգների կողմից հնարավոր հարձակումներից պաշտպանվելու նպատակով Իրանի զինված ուժերը 100 տոկոսանոց մարտական պատրաստության էին բերվել: Ցավոք, մարդկային գործոնը և սխալ արձակումը հանգեցրին մեծ աղետի, ինչը ցավալի է: Որպես Իրանի նախագահ` ես ցավակցություններս եմ հայտնում այս ողբերգական աղետի զոհերի ընտանիքներին»:

Հիշեցնենք, որ հունվարի 8-ի առավոտյան Թեհրանում կործանվել էր ՈւՄԱ-ին պատկանող Boeing 737 ուղևորատար ինքնաթիռը, որում 167 ուղևոր եւ անձնակազմի 9 անդամ կային։ Նրանք բոլորը զոհվել են, նրանց թվում՝ ավելի քան 30 օտարերկրացի, այդ թվում՝ 11 ուկրաինացի։ Մինչ այդ, Իրանը հերքում էր ԱՄՆ-ի և Կանադայի հայտարարությունները, թե հետախուզական տվյալները վկայում են այն մասին, որ ինքնաթիռը միտումնավոր խփվել է հրթիռով։