17.11.2024 | 18:22
Երևանում կկայանա աշխարհահռչակ շանսոնյե Շառլ Ազնավուրին նվիրված «Մսյո Ազնավուր» ֆիլմի պրեմիերան
Կոյուղաջրերը լցվում են բնակարանները, քայքայում են պատերը.Անդրանիկի 50 շենքի բնակիչները ահազանգում են
Հասարակություն
10.01.2020 | 20:45
Երևանի Մալաթիա-Սեբաստիա վարչական շրջանի Անդրանիկի 50 շենքում ոչ սանիտարահիգիենիկ իրավիճակ է ստեղծվել: Կոյուղաջուրը լցվում է բնակիչների բնակարաններ, վնասում վերանորոգումն ու տան գույքը: Ամբողջ շենքում գարշահոտություն է տարածված:
Բնակիչները հերթով ցույց են տալիս, թե ինչպես են խոնավության պատճառով վնասվել տան պատերը։ Դրանցից մեկին, ի դեպ, փակցված է վարչապետ Նիկոլ Փաշինյանի լուսանկարը, որի խիստ հայացքի ներքո էլ բնակիչները բողոքում են, որ անգամ հեղափոխությունից հետո իրենց կոյուղագծի խնդիրը չի լուծվում։
Խնդիրը բնակելի շենքում առկա է արդեն քսան տարի: Գլխավոր կոյուղատար համակարգը, ըստ բնակիչների, պետք է անհապաղ փոխել: Անդրանիկի 50 շենքի բնակիչները տևական ժամանակ է չեն կարողանում պարզել, թե կոյուղատար խողովակը որ հարկում է վնասված: Միայն հայտնի է, որ կոյուղաջուրը բազմաբնակարանի պատերին է դուրս տալիս 13-րդ հարկից սկսած: Այսպես՝ ամեն օր բնակիչները թակում են հարևանների դռները՝ պարզելու համար, թե որ հարկում է խնդիրը:
Անդրանիկի 50 շենքը գտնվում է «Արփի» համատիրության ենթակայության ներքո: Մալաթիա-Սեբաստիա վարչական շրջանի աշխատակազմից Factor.am-ին փոխանցեցին, որ նշյալ խնդրով հենց պետք է համատիրությունը զբաղվի: Բանկիչները նշում են, որ համատիրություն հաճախակի են բողոքում, նախատեսված վճարումները կատարում են, բայց որևէ արդյունք չկա:
Խնդրի կարգավորման շուրջ պարզաբանում ստանալու նպատակով այցելեցինք «Արփի» համատիրություն: Պարզվեց, որ աշխատանքային ժամին համատիրության կառավարիչ Վարդան Վարդանյանը տեղում չէ: Մեզ հետ հեռախոսազրույցում էլ Վարդան Վարդանյանը ոչ միայն հերքեց, որ բնակելի շենքի կոյուղատար խողովակի վերանորոգումը իր պարտավորությունների շրջանակներում է, այլև հրաժարվեց իր՝ համատիրության կառավարիչ լինելուց: Նրա պատասխանը հարուցեց հեռախոսահամարը մեզ տրամադրած իր գործընկերների զարմանքը:
Սա արդեն Անդրանիկի 50 շենքի նկուղն է: Կոյուղաջուրը բնակարաններով անցնելով վերջնական կուտակվում է այստեղ: Բնակիչները փոխանցեցին, որ կուտակված կեղտաջուրը երեկ են հեռացրել: Տարածքում երեկ նաև եղել են համատիրության աշխատակիցները: Խողովակների ոչ ամբողջական վերանորոգում են իրականացրել, սակայն բնակիչները նշում են, որ խնդիրը հիմնավոր լուծում է պահանջում:
«Արփի» համատիրությունից էլ ոչ պաշտոնապես փոխանցեցին, որ բնակիչներն անբարեխիղճ են վարվում կոյուղու հետ: Երեկ, օրինակ, խողովակից սավան են հանել: Նշեցին նաև, որ հարակից կառույցների՝ խանութների, ավտոտնակների կոյուղատար խողովակները ևս միացված են շենքի խողովակին, ինչը կրկնակի ծանրացնում է համակարգի աշխատանքը:
Նարեկ Կիրակոսյան
