Սերժ Սարգսյանի գործով նախաքննությունն ավարտվել է. ներգրավված է նաև գյուղնախարարության նախկին բարձրաստիճան պաշտոնյա

Հատուկ քննչական ծառայությունն ավարտել է ՀՀ երրորդ նախագահ Սերժ Սարգսյանի գործով նախաքննությունը: Այս մասին Factor.am-ին փոխանցում են Հատուկ քննչական ծառայությունից:

«Վարույթն իրականացնող մարմինը քրեական գործով ձեռք բերված ապացույցները բավարար է համարել` քրեական գործով մեղադրական եզրակացություն կազմելու և գործը դատարան ուղարկելու համար, որի մասին հայտնվել է մեղադրյալներին և նրանց պաշտպաններին։ Գործի նյութերը տրամադրվել են վերջիններիս` ծանոթանալու համար: Քրեական գործով մեղադրանք է առաջադրվել 5 անձանց, այդ թվում Սերժ Սարգսյանին և Բարսեղ Բեգլարյանին»,- ասաց ՀՔԾ խոսնակ Մարինա Օհանջանյանը:

Նշենք, որ քրեական գործով կա ևս երեք մեղադրյալ, բացի «Ֆլեշ» ընկերության սեփականատեր Բարսեղ Բեգլարյանից, գործով անցնում է նաև գյուղատնտեսության նախկին նախարար Սերգո Կարապետյանը: ՀՔԾ-ն այս տեղեկությունը ոչ հաստատում, ոչ էլ հերքում է:

Factor.am-ին նաև հայտնի դարձավ, թե ովքեր են մյուս երկու անձինք, ովքեր անցնում են քրգործով: Մեր աղբյուրների փոխանցմամբ՝ նրանք գյուղատնտեսության նախարարության նախկին աշխատակիցներ են:

Ի դեպ, նրանցից մեկը բարձրաստիճան պաշտոնյա է եղել:

Հիշեցնենք, որ դեկտեմբերի 4-ին ՀՀ երրորդ նախագահ Սերժ Սարգսյանին մեղադրանք էր առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով և որպես խափանման միջոց ընտրվել ստորագրությունը՝ չհեռանալու մասին։

Ըստ ՀՔԾ-ի հաղորդագրության` Սարգսյանը, զբաղեցնելով ՀՀ նախագահի պաշտոնը, օգտագործելով իր պաշտոնեական դիրքը, 2013 թվականին կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489.160.310 ՀՀ դրամի հափշտակության կատարումը:

Նարեկ Կիրակոսյան