Հիմա, որ ասեմ՝ քյաբաբ առ քյաբաբ բացահայտելու ենք, պետք է ասեն՝ ատելության քարոզչություն է իրականացվում ՀՀ-ում․ վարչապետ

Կառավարության նիստի ժամանակ Աշխատանքի և սոցիալական հարցերի նախարարի առաջին տեղակալ Գեմաֆին Գասպարյանը նեկայացրեց Հայաստանի Հանրապետության 2019 թվականի պետական բյուջեում վերաբաշխում, Հայաստանի Հանրապետության կառավարության 2018 թվականի դեկտեմբերի 27-ի N 1515-Ն որոշման մեջ փոփոխություններ և լրացումներ կատարելու մասին հարցը։

Վարչապետ Նիկոլ Փաշինյանը հետաքրքրվեց, որ այսինքն՝ այն նյութական օգնությունը, որ նախկինում գնում էր գիշերօթիկ դպրոցներին և երեխաներին, բաշխվում էր գիշերօթիկ դպրոցների միջոցով, ռիսկերով, հիմա դա ուղիղ հատկացնում ենք երեխաներին, նրանց ընտանիքներին։ Գասպարյանը նշեց, որ իրենց քաղաքականության տրամաբանության մեջ է ամբողջությամբ, որ հաստատություններից օգնությունը գնա դեպի ընտանիք, որպեսզի երեխաները մեծանան ընտանիքում։ Իսկ հարցին, թե որոշման հետ կապված աղմուկ-աղաղակը դադարե՞լ է, Գասպարյանը նշեց, որ իր կարծիքով՝ բավականին նվազել է, բայց չի կարող ասել՝ վաղն ինչ կլինի։

«Շատ հետաքրքիր է, որ ՀՀ-ում կան ուժեր, որոնք փորձում են ներկայացնել, թե ՀՀ կառավարությունն իր վարած քաղաքականությամբ ընտանեկան արժեքներին հակադրվում է և գործում է ընդդեմ ընտանեկան արժեքների։ Շատ հետաքրքիր է, որ երեխային ընտանիք վերադարձնելու այս քաղաքականությունը վարում է մեր կառավարությունը։ Երեխաների ապօրինի որդեգրման մեխանիզմներ ՀՀ-ում գոյություն են ունեցել այն իշխանության տարիներին, որոնք ազգային արժեքների դրոշը բռնած՝ ի՞նչ են արել, մենք բոլորս գիտենք, այդ թվում՝ կոնկրետ քաղաքական ուժեր։ Հետաքրքիր է, որ 2003-ից ՀՀ պարտավորությունն է եղել մանկատան շրջանավարտ երեխաներին ապահովել բնակարանով, և չակերտավոր ազգային կառավարությունները և նրանց հարակից կուսակցությունները ոչ մի կերպ չեն կարողացել այդ հարցը լուծել։ Մարդիկ են եղել, որ այդ ժամանակ նախարար են եղել հայտնի կուսակցությունից, այդ ընթացքում այս նպատակով բնակարանաշինություն է տեղի ունեցել։ Իսկ ինչո՞ւ այդ բնակարանները չեն հասել այդ երեխաներին։ Հիմա, որ գնանք, հետաքննենք, պարզենք և պարզվի ինչ-որ բան, այդ մարդիկ հայտնվեն բանտում, ի՞նչ է լինելու՝ պարզվելու է նրանք քաղաքական հալածյալ են։ Հանուն ազգի՝ պետական միջոցները քյաբաբների վրա ծախսածները հիմա ՀՀ-ում հանդես են գալիս ազգային արժեքների պաշտպանությամբ։ Հիմա, որ ասեմ՝ քյաբաբ առ քյաբաբ բացահայտելու ենք, պետք է ասեն՝ ատելության քարոզչություն է իրականացվում ՀՀ-ում»,- ասաց Նիկոլ Փաշինյանը։

Մանրամասները՝ տեսանյութում։