10.01.2025 | 23:14
ՊԵԿ նախագահն ընդունել է Հնդկաստանի դեսպանին
ԱՄՆ-ի Ներկայացուցիչների պալատն իմպիչմենթի է ենթարկել Դոնալդ Թրամփին
Քաղաքականություն
19.12.2019 | 10:00
ԱՄՆ Կոնգրեսի Ներկայացուցիչների պալատում երկրի նախագահ Դոնալդ Թրամփին անվստահության քվե հայտնելու, նրան իմպիչմենթի ենթարկելու հանգամանքը արդեն վաղուց էր համարվում անխուսափելի: Մոտ 8 ժամ տևած քննարկումներից հետո Ներկայացուցիչների պալատը՝ 230 կողմ, դեմ՝ 197-ը ձայներով իմպիչմենթի ենթարկեց նախագահին. հայտնում է voanews.com-ը:
Շարունակությունը Կոնգրեսի վերին պալատում է՝ Սենատում, որտեղ կանցկացվի դատավարություն, ինչպես նախատեսված է երկրի Սահմանադրությամբ: Այս ճանապարհով են անցել նաև Ամերիկայի նախագահներ Բիլ Քլինթոնը` 1998 թվականին, և Էնդրյու Ջոնսոնը` 1868-ին, նրանցից որևէ մեկի դեպքում, սակայն, գործընթացն ավարտին չի հասել, և ԱՄՆ պատմության մեջ որևէ նախագահ մինչ օրս պաշտոնանկ չի արվել իմպիչմենթի միջոցով:
Թրամփը մեղադրվում է իշխանությունը չարաշահելու համար Քվեարկությունից րոպեներ անց ձայների գրեթե նույն հարաբերակցությամբ հավանության արժանացավ նաև նախագահին առաջադրված երկրորդ` Կոնգրեսի աշխատանքը խոչընդոտելու մեղադրանքը:
Այսպիսով, Դոնալդ Թրամփը դարձավ Ամերիկայի պատմության մեջ երրորդ նախագահը, որն իմպիչմենթի է ենթարկվել Ներկայացուցիչների տանը:
Նշենք, որ աղմկահարույց այս քննությունը սկիզբ առավ ԱՄՆ նախագահի ու Ուկրաինայի նորընտիր առաջնորդի հուլիսյան հեռախոսազրույցից հետո: Ընդդիմախոսները պնդում են` Թրամփն այդ զրույցի ընթացքում փորձել է ճնշում գործադրել Զելենսկու վրա` պահանջելով քրեական հետապնդում սկսել առաջիկա նախագահական ընտրություններում իր հավանական մրցակից, նախկին փոխնախագահ Ջո Բայդենի և նրա որդու դեմ:
