18.10.2026 | 12:08
Լիտվայում և Լատվիայում երկնքում անհայտ օբյեկտի պատճառով օդային տագնապ է հայտարարվել
Բազմիցս ենք նշել՝ ներկա փուլում որևէ փաստաթուղթ չի քննարկվում. ԱԳՆ խոսնակը՝ «Լավրովի պլանի» մասին. ՏԵՍԱՆՅՈՒԹ
Քաղաքականություն
13.12.2019 | 16:36
Հայաստանի դիրքորոշումը Լեռնային Ղարաբաղի հարցում հստակ ներկայացվել է: Եվ վերջին անգամ ՀՀ ԱԳ նախարար Զոհրաբ Մնացականյանը Բրատիսլավայում իր ադրբեջանցի գործընկերոջ հետ հանդիպումից հետո ունեցած ելույթում նշել է, որ Ղարաբաղյան հիմնախնդրի կարգավորման հիմքը Արցախի ժողովրդի ինքնորոշման իրավունքի ճանաչումն է: Այսօր լրագրողների հետ հանդիպմանն այս մասին ասաց ՀՀ ԱԳՆ խոսնակ Աննա Նաղդալյանը՝ անդրադառնալով Ադրբեջանի ԱԳ նախարար Էլմար Մամեդյարովի հարցազրույցին:
«Ինքնորոշման իրավունք, որը պետք է իրացվի առանց սահմանափակման և հարկադրման: Այն բոլոր առաջարկները, որոնք չեն ապահովում Արցախի ժողովրդի ինքնորոշման իրավունքի իրացումը, չեն կարող ընդունելի լինել Հայաստանի համար»,- հավելեց նա։
Անդրադառնալով Արցախի ժողովրդի անվտանգության վերաբերյալ ձևակերպումներին՝ Աննա Նաղդալյանը շեշտեց, որ Ադրբեջանը 30 տարուց ավելի ձգվող իր հայատյաց քաղաքականությամբ փաստել է, որ որևէ պարագայում չի կարող ապահովել Արցախի ժողովրդի անվտանգությունը, իսկ Արցախի անվտանգությունը ենթակա չէ զիջման։
«Ադրբեջանական կողմը կա՛մ ընկալումների հետ կապված որոշակի խնդիրներ ունի, կա՛մ պարզապես չի ցանկանում ընկալել»,- ասաց Նաղդալյանը։
Ինչ վերաբերում է բանակցությունների սեղանին առկա փաստաթղթին, ԱԳՆ խոսնակն ասաց. «Մենք բազմիցս ենք նշել, որ ներկա փուլում որևէ փաստաթուղթ չի քննարկվում»:
Հիշեցնենք, որ Էլմար Մամեդյարովը հարցազրույցում հայտարարել էր, թե հայկական կողմից հանդիպումների ժամանակ մի շարք փաստաթղթեր են ի հայտ, որոնցից վերջինը «Լավրովի պլանն» էր:
Մանրամասները՝ տեսանյութում:
