Մանիպուլյացիայով մի՛ զբաղվեք․ Լիլիթ Մակունցը՝ «Բարգավաճ Հայաստանին». ՏԵՍԱՆՅՈՒԹ

Սիրելի «Բարգավաճ Հայաստան» խմբակցություն, խնդրում եմ, մանիպուլյացիայով մի՛ զբաղվեք։ Այս մասին ԱԺ-ում, դիմելով ԲՀԿ-ին, ասաց «Իմ քայլը» խմբակցության պատգամավոր Լիլիթ Մակունցը։

«Երբեք այս ամբիոնից, ոչ էլ որևէ տեղից չի հնչել՝ «դուք մեր դուրը չեք գալիս, հեռացեք», չի եղել նման բան։ Որևէ մեկը «Իմ քայլը» խմբակցությունից չի հնչեցրել գնդակահարելու, այրելու և ինկվիզիցիայի ենթարկելու արտահայտություն, չի եղել և մանիպուլյացիայի մի ենթարկեք։ Չի եղել «Իմ քայլը» խմբակցության կողմից հանրային, հրապարակային, պաշտոնական, ոչ պաշտոնական որևէ նման արտահայտություն։ Փոխարենը մենք ԲՀԿ-ից լսում ենք ցանկացած փոփոխության գնալու մերժում, հրաժարում, թույլ չտալու մոտեցումներ»,- ասաց Մակունցը։

Նա նկատեց, որ իրենք երբևէ չեն նշել, որ այս նախագծով գնում ենք ճգնաժամի լուծման։

«Մենք ասում ենք, որ ճգնաժամի լուծման համար անհրաժեշտ են ձեռնարկել քայլեր, և այս քայլը կարող է հանդիսանալ դրանցից մեկը։ Առաջարկում ենք խորքային բարեփոխումներ իրականացնել համերաշխության մթնոլորտում։ Սա ձեռքսեղմման նախագիծ է։ Այն, ինչ չի հնչել մեր կողմից, մի վերագրեք մեզ»,- ընդգծեց Մակունցը։

Հիշեցնենք, որ Ազգային ժողովում քննարկվում է Կառավարության կողմից ներկայացված Սահմանադրական դատարանի մասին Սահմանադրական օրենքում լրացում կատարելու մասին և Պաշտոնատար անձանց գործունեության ապահովման, սպասարկման և սոցիալական երաշխիքների մասին օրենքում լրացում կատարելու մասին նախագծերի փաթեթն երկրորդ ընթերցմամբ ընդունելու հարցը։

Մանրամասները՝ տեսանյութում։