16.03.2026 | 23:18
ԵՄ-ն պատժամիջոցներ է սահմանել չինական և իրանական ընկերությունների նկատմամբ՝ կիբերհարձակումների համար
Հետագայում ենթարկվելու եք քրեական պատասխանատվության․ Նաիրա Զոհրաբյանը՝ ՍԴ դատավորներին. ՏԵՍԱՆՅՈՒԹ
Քաղաքականություն
10.12.2019 | 11:05
«Բարգավաճ Հայաստան» խմբակցության պատգամավոր Նաիրա Զոհրաբյանն իր հետ ԱԺ էր բերել մի շարք չվերանորոգված դպրոցների նկարներ։ Նա նկատեց, որ մեր երկրում բազմաթիվ են դպրոցները, որոնց վերանորոգման համար կառավարությունը միջոցներ չի գտել՝ նաև այս տարվա բյուջեով։
«Եվ հիմա բերվել է մի նախագիծ, որը ոտքից գլուխ, աջից ձախ, հյուսիսից հարավ, վերևից ներքև քաղաքական է, բացարձակապես քաղաքական։ Որ ՍԴ-ի խնդիրը քաղաքական է` այդ մասին բաց և հրապարակային իր հարցազրույցներից մեկում ասաց ՀՀ առաջին փոխվարչապետ պարոն Ավինյանը։ Կարծում եմ՝ որևէ մեկը չի կասկածում, որ գործընթացն ուղղակիորեն քաղաքական է։ Հիմա դիմում եմ ձեզ՝ սիրելի համաքաղաքացիներ, մեր իշխանությանը դուր չի գալիս ՍԴ այս կազմը և հատկապես նրա նախագահը։ Ասել, որ մեր ուշքը գնում է Հրայր Թովմասյան պլյուս վեցնյակի համար, դա շատ մեծ շռայլություն կլինի, այդպես չէ»,- նկատեց Զոհրաբյանը։
Վերջինս նշեց, որ իրենք ուզում են, որ մեր երկրում գործընթացները լինեն բացառապես իրավական, և որևէ քաղաքական պրեսինգ չլինի։
«Հիմա մեզ առաջարկվում է, սիրելի համաքաղաքացիներ, մեր և ձեր հարկերից 630 մլն դրամ վճարենք ՍԴ դատավորներին, որ նրանք գնան տուն, նստեն թախտին և Հրայր Թովմասյանն ու մյուս դատավորներն ամսական 1 մլն դրամից ավելի գումար ստանան»,- ասաց Նաիրա Զոհրաբյանը։
Նա, դիմելով ՍԴ այն դատավորներին, որոնք կգայթակղվեն այս նախագծով, հիշեցրեց՝ իշխանությունը հավերժ չէ, և ով գնացել է այս քաղաքական գործարքին, ոչ միայն վերադարձնելու է այս գումարները, այլ ենթարկվելու է քրեական պատասխանատվության։
Հիշեցնենք, որ Ազգային ժողովում քննարկվում է Կառավարության կողմից ներկայացված Սահմանադրական դատարանի մասին Սահմանադրական օրենքում լրացում կատարելու մասին և Պաշտոնատար անձանց գործունեության ապահովման, սպասարկման և սոցիալական երաշխիքների մասին օրենքում լրացում կատարելու մասին նախագծերի փաթեթն առաջին ընթերցմամբ ընդունելու հարցը։
Մանրամասները՝ տեսանյութում։
