Սերժ Սարգսյանն անհրաժեշտ համարեց ամբողջ տեղեկությունը հավաքել իր բռում և Ոստիկանությանը զրկեց գաղտնալսելու հնարավորությունից․ Արման Բաբաջանյան. ՏԵՍԱՆՅՈՒԹ

«Ուղիղ մեկ տարի առաջ՝ դեկտեմբերի 9-ին, տեղի ունեցան խորհրդարանական ընտրություններ: Հիշենք նաև, թե այդ ընտրություններն ինչի համար էին, և թե որքանով է իշխանությունը՝ հատկապես կառավարությունը, Արդարադատության նախարարությունը հապաղել բարեփոխումների հարցում: Իսկ այդ ընտրությունների գլխավոր ուղերձը, հիմնական անելիքը և մանդատը, որ տրվել է, հենց բարեփոխումներն արագացնելու և երկիրը նոր հիմքերի վրա դնելու՝ ուղղակի հանձնարարություն է եղել։ Կարծում եմ, որ առաջարկված այս փոփոխությունը դրա մասին է»,- այս մասին ԱԺ-ում իր ելույթի ժամանակ ասաց պատգամավոր Արման Բաբաջանյանը։

«Հայտնի փոփոխությունը կատարվել է 2007թ. հոկտեմբերին, երբ Լևոն Տեր-Պետրոսյանը ընդամենը 1 ամիս առաջ հայտարարել էր նախագահի թեկնածու առաջադրվելու մասին։ Եվ Սերժ Սարգսյանը, որն արդեն ՀՀԿ-ն համալրել էր իր քրեական ընկերներով, օլիգարխներով, անհրաժեշտ էր համարել, որ ամբողջ տեղեկությունները հավաքեր իր բռում՝ ԱԱԾ-ում, և դրանով Ոստիկանությանը զրկեց գաղտնալսելու և փոխզսպումների հայտնի այդ հնարավորությունից»,- նկատեց Բաբաջանյանը:

Նրա կարծիքով՝ Արդարադատության նախարարության վերապահումն այս պահին անհասկանալի է. «Կոչ եմ անում կողմ քվեարկել, և հորդորում եմ Արդարադատության նախարարությանը բարեփոխումներին տեմպ տալ, արագացնել»:

Հիշեցնենք, որ Ազգային ժողովում քննարկվում է «Օպերատիվ-հետախուզական գործունեության մասին» ՀՀ օրենքում փոփոխություններ կատարելու մասին» օրինագիծը։

Մանրամասները՝ տեսանյութում։