Ադրբեջանն Արցախի հարցով «կարմիր գծեր» է ներկայացրել

Պաշտոնական Բաքուն Լեռնային Ղարաբաղի հակամարտության խաղաղ կարգավորման վերաբերյալ իր դիրքորոշումն է ներկայացրել ԵԱՀԿ նախարարների խորհրդի մասնակիցներին, որը մեկնարկելու է Բրատիսլավայում դեկտեմբերի 5-ին: Այս մասին գրում է Minval.az-ը՝ վկայակոչելով Ավստրիայում, Սլովակիայում և Սլովենիայում Ադրբեջանի դեսպանատան կողմից Twitter- ում հրապարակված փաստաթուղթը:

Դրանում նշվում է, որ Ադրբեջանը հանձնառու է հակամարտությունը լուծել քաղաքական միջոցներով՝ ԵԱՀԿ Մինսկի խմբի շրջանակում:

«Հակամարտության կարգավորումը հնարավոր է միայն Հելսինկյան եզրափակիչ ակտում ամրագրված միջազգային իրավունքի նորմերի և սկզբունքների հիման վրա՝ ամբողջությամբ հարգելով Ադրբեջանի Հանրապետության ինքնիշխանությունն ու տարածքային ամբողջականությունը՝ միջազգայնորեն ճանաչված սահմաններում»,- նշվում է փաստաթղթում:

Ադրբեջանական կողմը նշել է, որ հավատարիմ է հակամարտության լուծման փուլային մոտեցմանը, որը հիմնված է ՄԱԿ-ի Անվտանգության խորհրդի բանաձևերի և ԵԱՀԿ որոշումների, մասնավորապես՝ 1994 թ. Բուդապեշտի գագաթնաժողովի որոշման վրա:

Այնուհետև ներկայացվում է քայլերի հերթականություն, որոնք պետք է իրականացնել՝ հակամարտության կարգավորմանը հասնելու համար:

«Առաջին քայլը պետք է լինի հայկական զինված ուժերի ամբողջական և անվերապահ դուրսբերումը Լեռնային Ղարաբաղից և Ադրբեջանի գրավյալ այլ տարածքներից:

Դրան պետք է հետևեն բռնի տեղահանված ադրբեջանական բնակչության վերադարձը՝ անվտանգության բոլոր անհրաժեշտ միջոցները պահպանելով, ինչպես նաև տարածաշրջանում հաղորդակցման ուղիների բացումը:

Որպես հաջորդ փուլ՝ Ադրբեջանը տեսնում է Լեռնային Ղարաբաղի տարածաշրջանի կարգավիճակի որոշումը՝ իր կազմում, Ադրբեջանի Սահմանադրության և օրենսդրության համաձայն:

Նման կարգավիճակը պետք է ապահովի տարածաշրջանի հայ և ադրբեջանական համայնքների խաղաղ գոյակցությունը, երաշխավորի մարդու իրավունքների և ազատությունների լիարժեք իրացումը՝ հավասար և ոչ խտրական հիմունքներով»,- ասվում է փաստաթղթում:

Իսկ Լեռնային Ղարաբաղի կարգավիճակի որոշումը, ըստ հրապարակված փաստաթղթի, պետք է տեղի ունենա «խաղաղ պայմաններում՝ իրավական գործընթացի շրջանակում, Լեռնային Ղարաբաղի շրջանի բնակչության, մասնավորապես՝ հայկական և ադրբեջանական համայնքների անմիջական, լիարժեք և հավասար մասնակցությամբ, և Ադրբեջանի կառավարության հետ նրանց փոխգործակցությամբ՝ բացառապես իրավական և ժողովրդավարական գործընթացի շրջանակում»:

Ի վերջո, փաստաթղթի եզրափակիչ մասի համաձայն, Ադրբեջանը վերը նշված շրջանակից դուրս հակամարտության քաղաքական լուծում չի տեսնում: