02.11.2024 | 15:55
Չինաստանում մեկնարկել է Խաչատրյանի անվան պատանեկան միջազգային մրցույթի եզրափակիչ փուլը
Պրովոկացիա էր, եկել էին խանգարելու համար. Լարա Ահարոնյանը՝ ընտանեկան բռնությունը կանխարգելող օրենքի նախագծի ընթացքում գրանցված միջադեպի մասին
09.10.2017 | 20:24
«Կանանց ռեսուրսային կենտրոն» ՀԿ ղեկավար Լարա Ահարոնյանի գնահատմամբ՝ այսօր «Ընտանեկան բռնությունների կանխարգելման և ընտանեկան բռնությունների զոհերի պաշտպանության» մասին օրինագծի հանրային քննարկման ժամանակ տեղի ունեցած միջադեպը պրովոկացիա էր:
«Այն հարցերից, որոնք բարձրաձայնվեցին, հասկանալի դարձավ՝ շատերը չէին էլ կարդացել օրինագիծը: Դավադրություններ են մեջտեղ բերում, դա ցույց տվեց, որ այստեղ ներկայացել էին խանգարելու համար: Նպատակ չունեին կոնկրետ խոսակցության մեջ մտնելու, ինչն, իհարկե, իրենց համար ավելի նախընտրելի էր»,- Factor.am-ի հետ զրույցում ասաց տիկին Ահարոնյանը՝ նկատելով, որ օրինագծին դեմ արտահայտվողները չէին էլ լսում անգամ իրենց առաջ քաշած հարցերի պատասխանները:
Մեր զրուցակիցն, այդուհանդերձ, շեշտեց՝ այսպիսի քննարկումներ կառավարությունը պետք է հաճախ կազմակերպի, որոնք նրա համոզմամբ՝ ժողովրդավարական գործընթացների մասն են կազմում:
«Պարզապես ես ակնկալում էի, որ մարդիկ մի քիչ ավելի ցիվիլ ձևով հարցեր տային, հատկապես, որ բռնության մասին էինք խոսում, սակայն հնչում էին բռնարար կոչեր»,- ընդգծեց Լարա Ահարոնյանը: Նշենք, որ այսօր «Ընտանեկան բռնությունների կանխարգելման և ընտանեկան բռնությունների զոհերի պաշտպանության» մասին օրինագծի հանրային քննարկումը մի քանի անգամ ընդհատվեց: Նախագծի ընդդիմախոսները` Խաչիկ Ստամբոլցյանը, «Հանուն ինքնիշխանության վերականգնման» նախաձեռնության համակարգող Հայկ Նահապետյանը և մի խումբ այլ անձինք վիրավորական արտահայտություններ հնչեցնելով օրինագծի հեղինակների հասցեին` խաթարում էին քննարկման ընթացքը:
Ի վերջո` Արդարադատության նախարարը քննարկման կեսից հեռացավ, ինչից հետո քննարկումը նախատեսվածից շուտ ավարտվեց:
Մանրամասները՝ տեսանյութում:
Շողիկ Գալստյան
