Վենետիկի Սուրբ Ղազար կղզին ջրհեղեղի պատճառով վնասներ է կրել. ԼՈՒՍԱՆԿԱՐՆԵՐ

Վենետիկում նոյեմբերի 12-ի երեկոյան սկսած անբարենպաստ եղանակի պատճառով ջրի մակարդակը հասել է 180 սանտիմետրի, ինչի հետևանքով քանդվել են քարափներ, խորտակվել են նավեր:

Ջուրը հեղեղել է ողջ քաղաքը: Սուրբ Ղազար կղզին նույնպես վնասներ է կրել: Մխիթարյան միաբանությունից Հայր Համազասպ Քեշիշյանը հայտնում է, որ գետնահարկի բոլոր սենյակները ողողվել են լճակի տղմոտ ջրով,  ջուր է լցվել նաև սեղանատուն:

«Դժբախտաբար, անգամ եկեղեցին է լցվել կես մետր ջրով՝ հասնելով ավանդատուն, վնասել են եկեղեցական որոշ զգեստներ և ձեռագործ զարդարանքներ ու գորգեր: Միայն վաղ առավոտյան տեսանք, որ կղզու հարավային կողմը եզերող պարիսպն ամբողջությամբ քանդվել էր»,- գրել է նա։

Հայր Համազասպը նաև տեղեկացնում է, որ վնասվել է վանքի մոտ կայանված Արմենիա առագաստանավը, որին ալիքները քշել են և որը հարվածելով պարիսպներին՝ քանդել է այն։

Վանքի Մատենադարանը, պատկերասրահը, ձեռագրատունն ու դիվանն անվնաս են մնացել:

Ավելի վաղ Վենետիկի իշխանությունները հայտնել էին, որ քաղաքում  ջրի մակարդակը հասել է ռեկորդային 187 սանտիմետրի:  Ավանդաբար չորս տարին մեկ է Վենետիկը «բարձր ջրի» շրջան ապրում եղանակի հետևանքների պատճառով: Որպես կանոն ջուրը 110 սանտիմետրից ավելի չի բարձրանում՝ հեղեղելով քաղաքի մոտ 10 տոկոսը: Իշխանությունների տեղեկությամբ, 140 սանտիմետրից բարձր ջուրը հեղեղում է քաղաքի 90 տոկոսը: 1966 թվականի 194 սանտիմետրից հետո սա պատմության մեջ երկրորդ ամենաբարձր մակարդակն է: