«Հայապակի» ընկերությունը վաճառքի պահին եղել է թալանված վիճակում․ Նազիկ Ամիրյանի փաստաբան

Հերթական հնարովի քրեական գործը, որով փորձում են հասարակությանը ներկայացնել մի բան, որն իրականում գոյություն չունի։ Այս մասին այսօր լրագրողների հետ հանդիպման ժամանակ ասաց Բյուրեղավանի «Հայապակի» ընկերության նախկին սեփականատեր Նազիկ Ամիրյանի փաստաբան Լևոն Բաղդասարյանը։

Փաստաբանը տեղեկացրեց, որ, թեպետ, կանոնադրական կապիտալը եղել է 7-8 հարյուր մլն դրամի չափով, բայց գործարանը, որպես այդպիսին, վաճառքի պահին եղել է թալանված վիճակում։

«Դա փաստ է, և ցանկացած լիազոր մարմին լավագույն ցանկության դեպքում, որ մի փոքր աշխատի, կտեսնի, որ դա այդպես է։ Երբ մեր վստահորդը գնել է այդ գործարանը, վերցրել է որոշակի պարտավորություն։ Նախ՝ գործարանը գնվել է պարտքերի մեջ թաղված վիճակում։ Եվ վերցրել է պարտավորություն, որպեսզի այդ պայմանագրում երևացող պարտքերի պարտավորությունը կատարի և ինչու չէ՝ նաև վերցրել է պարտավորություն՝ ներդրումներ կատարելու համար»,- ասաց Բաղդասարյանը։

Վերջինիս փոխանցմամբ՝ գործարանի գնումից անմիջապես հետո տարբեր տեղերից հայտնվել են պարտատերեր՝ սկսած աշխատողներից, վերցրած այլ պարտավորություններ, որոնք չեն երևացել պայմանագրի մեջ։ «Ի՞նչ է արել մեր վստահորդը․ մեր վստահորդը ներդրումներ է կատարել, ավելին՝ դիմել է տարբեր բանկային միավորումների, որ վերցնի, այսպես ասած, տոկոսով գումար, որպեսզի կարողանա այդ պարտավորությունները կատարել։ Ցավոք, այդ ժամանակվա տնտեսական քաղաքականությունը եղել է այնպիսին, որ ո՛չ պետությունն է հովանի կանգնել, և ո՛չ էլ բանկերն են այդ գումարները տվել։ Դրանից հետո պետական լիազոր մարմինը տանում է սնանկացման։ Արդյունքում գործարանը վաճառվում է։ Այժմ անցել է 15 տարի, որոշել են, որ այդ սնանկությունը կեղծ է եղել։ Այսինքն՝ պետական լիազոր մարմինը, ըստ էության, կեղծ սնանկության գործարքի է գնացել, և փորձում են մեր վստահորդին մեղադրել մի բանի մեջ, որի մեջ ինքը չկա»,- ասաց Բաղդասարյանը։

Փաստաբան Գուրգեն Գրիգորյանն էլ իր հերթին նկատեց, որ 2001 թվականից Նազիկ Ամիրյանը խնդրել է մինչև անգամ վարչապետին, որ «Հայապակի» ընկերությունը թողնեն աշխատացնել։ «Բազմաթիվ խնդրանքներ, որ հարկերը սառեցնեն, խնդրել է՝ բանկերին թույլատրեն, որ իրենց գումարներ հատկացնեն, որպեսզի կարողանան գործարանն աշխատացնել։ Իր բիզնեսից եղած միջոցները բերել ներդրել է մի տեղ, որտեղ ռիսկային է»,- նկատեց փաստաբանը։

Ոստիկանությունից ավելի վաղ տեղեկացրել էին, խաբեությամբ հափշտակվել է «Հայապակի» ընկերության 571․166․000 դրամ արժողությամբ գույքը։

Ա․Ա․