07.09.2026 | 17:54
Արարատ Միրզոյանն ու Լատվիայի ԱԳ նախարարը արձանագրություն են ստորագրել
Ես վստահ եմ, որ ազնիվ եմ, ոչ մի հանցագործություն չեմ գործել․ Սեդրակ Առուստամյանի գործով որոշումը կհրապարակվի երկուշաբթի
Հասարակություն
25.10.2019 | 16:02
«Մուլտի գրուպ» ընկերության տնօրեն Սեդրակ Առուստամյանին գրավով ազատ արձակելու որոշման դեմ Դատախազության բողոքի քննությունն այսօր ավարտվեց։ Որոշումը Վերաքննիչ դատարանը կհրապարակի երկուշաբթի օրը։
Լրագրողների հետ զրույցում Առուստամյանը հայտնել է, որ չի ընդունում իրեն առաջադրված մեղադրանքը։ Հարցին, թե ինչու է ձեռնափայտով եկել դատարան Առուստամյանը պատասխանել է՝ ծունկն է վիրահատել։
Լրագրողները նրանից հետաքրքրվել են, թե արդյոք առաջադրված մեղադրանքում քաղաքական ենթատեքստ տեսնում է․ «Ես վստահ եմ, որ ազնիվ եմ, ոչ մի հանցագործություն չեմ գործել։ Ես քաղաքականության հետ կապ չունեցող անձ եմ»։
Հիշեցնենք, որ Սեդրակ Առուստամյանը վերջերս 20 մլն դրամի գրավի դիմաց ազատ էր արձակվել կալանքից։ Նա մեղադրվում է Քրեական օրենսգրքի 190-րդ հոդվածի 3-րդ մասի 1-ին կետով, 38-189-րդ հոդվածի 3-րդ մասով, 38-205-րդ հոդվածի 2-րդ մասով նախատեսված հանցավոր արարքներ կատարելու համար:
Ըստ Քննչական կոմիտեի տարածած հաղորդագրության՝ «Սեդրակ Առուստամյանը, փաստացի ղեկավարելով «Սթոնս» ՍՊ ընկերության գործունեությունը, միաժամանակ, 2016թ. հունիսի 10-ից օգոստոսի 8-ն ընկած ժամանակահատվածում հանդիսանալով «Սթոնս» ՍՊ ընկերության 100 տոկոս բաժնեմասի սեփականատեր, ընկերության աշխատանքներն իր հետ համակարգող Սուրեն Ավագյանի և Գուրգեն Սարգսյանի հետ միասին, «Հյուսիս-Հարավ ճանապարհային միջանցք» ծրագրի «М1 Թալինից Գյումրի ճանապարհի վերակառուցում և բարելավում» ենթածրագրի շրջանակներում Թալին-Լանջիկ և Լանջիկ-Գյումրի հատվածների շինարարական աշխատանքներն իրականացնող կապալառու «Սինոհիդրո քորփորեյշն» ՍՊ ընկերության հայաստանյան մասնաճյուղի ներկայացուցիչների դրդմամբ, հանցավոր համաձայնություն է ձեռք բերել՝ «Սինոհիդրո քորփորեյշն» ՍՊ ընկերության հայաստանյան մասնաճյուղին առանց ծառայությունների մատուցման հարկային հաշիվներ դուրս գրելու միջոցով ընկերությունից ապօրինի ֆինանսական միջոցներ դուրս բերելու, դրանց հանցավոր ծագումը թաքցնելու և խեղաթյուրելու նպատակով դրանք իրենց փոխկապակցված այլ ընկերությունների փոխանցելու և գումարները այլ ծախսերի պատրվակով կամ որպես շահաբաժնի անվան տակ կանխիկացնելու և օրինական շրջանառություն մտցնելու և այդ կերպ նաև «Սինոհիդրո քորփորեյշն» ՍՊ ընկերության հայաստանյան մասնաճյուղի կողմից առանձնապես խոշոր չափերով հարկերից խուսափելուն օժանդակելու վերաբերյալ»:
