Գագիկ Ծառուկյանի հայտարարագրած դրամական միջոցների ընդհանուր ծավալը կազմում է ԱԺ բոլոր պատգամավորների հայտարարագրած դրամական միջոցների 97%-ը. ԱԺ մոնիթորինգի արդյունքները. ՏԵՍԱՆՅՈՒԹ

«Մանդատ» տեղեկատվական ՀԿ-ն անցկացրել է մոնիթորինգ՝ 7-րդ գումարման Ազգային ժողովի 2-րդ նստաշրջանի վերաբերյալ։ ՀԿ նախագահ Լուսինե Վասիլյանն այսօր հրավիրված՝ «Աժ մոնիթորինգ. 7-րդ գումարման ԱԺ-ի 2-րդ նստաշրջանի դիտարկման արդյունքները» քննարկման ընթացքում նշեց․ «ԲՀԿ ղեկավար Գագիկ Ծառուկյանը Ազգային ժողովի 2-րդ նստաշրջանի ընթացքում զիջել է տարիներ շարունակ ամենաշատ բացակայող պատգամավորների տասնյակի առաջին հորիզոնականը։ Ամենաշատ բացակայող պատգամավորն այժմ Վարդան Ղուկասյանն է, կրկին ԲՀԿ-ից»։

Նրա խոսքով՝  հետհեղափոխական խորհրդարանի 2-րդ նստաշրջանի ընթացքում գումարվել է 6 հերթական և 4 արտահերթ նիստ, ընդունվել է 143 օրենք, որոնց մեծամասնությունը նախաձեռնել է Կառավարությունը: Պատգամավորներն այս ընթացքում միայն 12 օրենքի նախագիծ են առաջարկել։

«143 օրենքից 44%-ն ընդունվել է հենց արտահերթ նստաշրջանների ընթացքում։ Ոլորտային առումով շարունակել են գերակշռել իրավական և տնտեսական  ոլորտներին վերաբերող օրենքները։ Սրանք կազմել են ընդունված օրենքների 80%-ը»,- ասաց Լուսինե Վասիլյանը։

7-րդ գումարման ԱԺ-ի 2-րդ նստաշրջանի դիտարկման արդյունքները ներկայացնելիս,  «Մանդատ» տեղեկատվական ՀԿ նախագահը նաև ուշագրավ մանրամասներ ներկայացրեց․ «ԲՀԿ խմբակցության ղեկավար Գագիկ Ծառուկյանի հայտարարագրած դրամական միջոցների ընդհանուր ծավալը կազմում է ԱԺ բոլոր պատգամավորների հայտարարագրած դրամական միջոցների 97%-ը։ Ի տարբերություն նախորդ՝ 6-րդ գումարման Ազգային ժողովի, որտեղ կար 12 դոլարային միլիոնատեր, 7-րդ գումարման ԱԺ-ում դոլարային միլիոնատեր պատգամավորները 2-ն են, երկուսն էլ` «Բարգավաճ Հայաստան»-ից: 132 պատգամավորներից միայն Գագիկ Ծառուկյանի (ԲՀԿ) և Դավիթ Մանուկյանի (ԲՀԿ) հայտարարագրած դրամական միջոցների ծավալն է դոլարային արտահայտությամբ գերազանցում 1 մլն դոլարը։ Ամենից շատ դրամական միջոցներ հայտարարագրած 10 պատգամավորներից 9-ը ԲՀԿ անդամ են, և միայն մեկն է «Իմ քայլը» խմբակցությունից՝ Տիգրան Կարապետյանը»։

Մանրամասները՝ տեսանյութում։

Նելլի Մելքոնյան