27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Դավիթ Տոնոյանը վստահեցնում է՝ ցավոտ անակնկալներ չեն լինի․ ՏԵՍԱՆՅՈՒԹ
Քաղաքականություն
18.09.2019 | 11:46
Պաշտպանության նախարար Դավիթ Տոնոյանին հայտնի չէ որևէ տարաձայնություն ԱԱԾ նախկին տնօրեն Արթուր Վանեցյանի և վարչապետ Նիկոլ Փաշինյանի միջև: Այս մասին այսօր ԱԺ-ում լրագրողների հետ զրույցում ասաց նախարարը՝ միաժամանակ հրաժարվելով մեկնաբանել Արթուր Վանեցյանի հրաժարականի տեքստը:
«Ազգային անվտանգության ծառայության նախկին տնօրենն իմ ընկերն է, իմ գործընկերն է, և ես բոլոր մեկնաբանությունները կթողնեմ իրեն»,- ասաց Տոնոյանը։
Պաշտպանության նախարարությունում պաշտոնանկությունների հնարավորության մասին հարցին ի պատասխան՝ Դավիթ Տոնոյանը վստահեցրեց, որ բանակում պաշտոնանկություններ չեն սպասվում։
Հարցին՝ արդյո՞ք Պաշտպանության նախարարությունը չունի մտավախություն, որ ԱԺ-ում Ապրիլյան պատերազմի հանգամանքներն ուսումնասիրող քննիչ հանձնաժողովի աշխատանքի արդյունքում ցավոտ անակնկալներ կլինեն, Տոնոյանը պատասխանեց. «Ցավոտ անակնկալներ չեն լինի։ Ինձ բավարարում է հանձնաժողովի աշխատանքը։ Մենք հանձնաժողովի աշխատանքը հագեցնում ենք տեղեկություններով։ Աշխատանքը բավարար է, քանի որ կարծում եմ՝ այն տեղեկությունները, որ ստանում են իրենք, բավարար են լինելու եզրակացություն անելու համար»,- ասաց Տոնոյանը՝ չբացառելով, որ գուցե այդ հանձնաժողովի աշխատանքի արդյունքում հարուցվեն քրեական գործեր:
