30.04.2026 | 19:47
Չեմպիոնների լիգայում հայտնի է շաբաթվա լավագույն ֆուտբոլիստը
Վրաստանի վարչապետը հայտնել է հրաժարական ներկայացնելու որոշման մասին
Քաղաքականություն
02.09.2019 | 13:08
Վրաստանի վարչապետ Մամուկա Բախտաձեն հրաժարականի որոշում է կայացրել: Այս մասին վրացական Կառավարության ղեկավարը տեղեկացրել է ֆեյսբուքյան գրառմամբ, հաղորդում է Sputnik Georgia-ն:
«2018 թվականին Վրաստանի վարչապետի պաշտոնում իմ առաջադրման նպատակը և հիմնական մանդատը երկրի համար ռազմավարական զարգացման շրջանակների ստեղծումն ու ներդրումն էր, որոնք առաջիկա տարիներին կապահովեին մեր պետական նպատակների իրագործումը, կդառնային երկրի զարգացման ուղեցույցը: Ռազմավարական զարգացման շրջանակները ստեղծված են, հետևաբար՝ ես որոշում եմ ընդունել պաշտոնը լքելու մասին, քանի որ կարծում եմ, որ իմ առաքելությունն այս փուլում կատարել եմ»,- գրել է Բախտաձեն։
Նրա խոսքով՝ այսօր Վրաստանին ավելի, քան երբևէ, լիարժեք կոնսոլիդացիա է անհրաժեշտ:
«Վստահ եմ, որ դա է հաջողության միակ բանաձևը: Եվս մեկ անգամ շնորհակալ եմ վրաց հասարակությանը: Հավատում եմ, որ մենք ամեն ինչ կարող ենք: Թող Աստված օրհնի Վրաստանը»,- նշել է Բախտաձեն:
Վրացական լրատվամիջոցների փոխանցմամբ՝ Վրաստանի նոր վարչապետ կարող են դառնալ ՆԳ նախարար Գեորգի Գախարիան կամ տարածքային զարգացման և ենթակառուցվածքների նախարար Մայա Ցկիտիշվիլին:
Հավելենք, որ Մամուկա Բախտաձեն Վրաստանի կառավարությունը գլխավորում էր 2018 թվականի հունիսից:
