17.08.2026 | 23:08
Զորականում և Ամասիայում շչակներ են փորձարկվելու
Ազգային ժողովից 15 միլիոն դրամի գույք է անհետացել
Քաղաքականություն
23.08.2019 | 20:20
Ազգային ժողովում 15,5 միլիոն դրամի գույքի պակասորդ կա: Այս մասին Factor.am-ի գրավոր հարցերին ի պատասխան փոխանցեցին Ազգային ժողովի աշխատակազմից:
Ազգային ժողովի տարածքում 2019 թվականի մարտի14-ին աշխատակազմի ղեկավարի հրամանով իրականացված գույքագրման արդյունքում պարզվել է, որ 54 անուն ապրանք տեղում չէ: Մասնավորապես, կառույցից բացակայում է 22 համակարգիչ, երկու տերաբայթ տեղեկատվության ծավալով 2 արտաքին կոշտ սկավառակներ, 5 ինֆրակարմիր ընդունիչներ, այլ տեխնիկական միջոցներ եւ գույք:
Գույքի պակասորդի մասին տեղեկությունները ԱԺ աշխատակազմը փոխանցել է իրավապահ մարմիններին:
Ազգային ժողովի աշխատակազմի ղեկավարի նախկին տեղակալ Արսեն Բաբայանը Factor.am-ի հետ զրույցում բացառեց այն հնարավոր տարբերակը, որ գույքը կորել է իրենց աշխատանքի ժամանակահատվածում:
«Մենք էլ ենք ժամանակին արել գույքագրում եւ ամբողջ գույքագրումը պահպանված է: Եթե տեսել են, որ չկան համակարգիչները, պետք է դիմեն իրավապահ մարմիններին: Մեր գույքագրման ժամանակ մենք չենք ունեցել համակարգիչների որեւէ կորուստ»,- հավաստիացրեց նախկին պաշտոնյան:
Գլխավոր դատախազությունից մեզ փոխանցեցին, որ ԱԺ-ից բացակայող գուքի վերաբերյալ հարուցվել է քրեական գործ: Ընթանում է նախաքննություն: Այս պահին գործում ներգրավված անձ չկա:
Նարեկ Կիրակոսյան
