14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ռոբերտ Քոչարյանի պաշտպանները՝ Արթուր Վանեցյանի երեկվա հայտարարության և Օգանովսկու վերաբերյալ BBC-ի հոդվածի մասին
Հասարակություն
07.08.2019 | 13:45
Ռոբերտ Քոչարյանի պաշտպաններն այսօր ասուլիս էին հրավիրել: Ինչպես իրենք ասացին` պատճառը գործով որևէ զարգացում չլինելն է: Ռոբերտ Քոչարյանի կալանավորումից հետո չկա դատավոր, որը կշարունակի քննել գործը: Առաջին ատյանի դատավոր Դավիթ Գրիգորյանի, որը պետք է շարունակեր գործի քննությունը, լիազորությունները կասցվել են, բայց գործը այլ դատավորի չի մակագրվել:
Արամ Օրբելյանն ասաց` սա մարդու իրավունքների կոպտագույն խախտում է․ «Ունենք իրավիճակ, որտեղ Ռոբերտ Քոչարյանը գտնվում է անազատության մեջ, սակայն այդ գործընթացը չի վերահսկվում որևէ դատարանի կողմից, չկա որևէ դատարան, որը կարող է ազատելու, չազատելու, այլընտրանքային խափանման միջոցի վերաբերյալ որևէ որոշում ընդունել»։
Պաշտպանական խումբը նաև Ռոբերտ Քոչարյանին գրավի դիմաց ազատ արձակելու միջնորդություն էին ներկայացրել, որը սակայն ևս չի քննվել, նույն պատճառով՝ դատավոր չկա:
Անդրադառնալով BBC-ի հրապարակմանը, որ Արցախից Հայաստան զորք է բերվել Սամվել Օգանովսկու գլխավորության, որը և կրակել է ժողովրդի ուղղությամբ, Արամ Օրբելյանն ասաց` գործի նյութերում նման դրվագներ չկան:
Քոչարյանի պաշտպաններից Հովհաննես Խուդոյանը ևս պնդեց` անգամ մեկ ցուցմունք չկա այդ մասին: Արամ Օրբելյանը նաև ասաց, որ հոդվածում տեղ գտած պնդումները և փաստական տվյալները միմյանց չեն համապատասխանում.
«Այն, որ այդ զորքը Բ26- նկուղում է գտնվել, Ռոբերտ Քոչարյանն ու Սերժ Սարգսյանը պարբերաբար այցելել են նրանց և սպանությունները միասեռ են եղել (ի նկատի ունի, որ 10-ը սպանությունները իրականացվել են տարբեր հանգամանքներու․ խմբ․), չի համապատասխանում իրականությանը»:
Պաշտպանները կարծիք հայտնեցին, որ սրանք կարող են վերցրած լինել քննիչի իրականացրած հարցաքննությունից, որտեղ նմանատիպ բովանդակությամբ բազմաթիվ հարցադրումներ են արվում, որոնց մեծ մասը հերքվել է:
Արամ Օրբելյանը նաև ասաց, որ տեղյակ չէ՝ ինչ փաստաթղթերի մասին է խոսել Ազգային անվտնագության ծառայության տնօրեն Արթուր Վանեցյանը, երբ Արցախում երեկ հայտարարել է, որ Ազգային անվտանգության ծառայությունից (ԱԱԾ) անհետացած փաստաթղթերի մեծ մասը վերականգնվել է և միացվել է Մարտի 1-ի գործի քննությանը։
Նա պնդեց՝ իր համար անհասկանալի է՝ ի՞նչ իրավական հիմքերի վրա են ԱԱԾ-ում նյութեր պահվում․ «Պետք է հասկանալ՝ ինչի՞ մասին է խոսքը, որից հետո հնարավոր կլինի իրավական գնահատկան տալ», – ասաց Օրբելյանը։
Լիլիթ Շաբոյան
