Տուրօպերատորները հարկային պարտավորություններից խուսափել են․ ՏՄՊՊՀ-ն չարաշահումներ է հայտնաբերել․ ՏԵՍԱՆՅՈՒԹ

ՀՀ տնտեսական մրցակցության պաշտպանության պետական հանձնաժողովն ուսումնասիրություններ է իրականացրել դեպի Եգիպտոս ուղևորափոխադրումների շուկայում և դիմել է բոլոր ավիաըներություններին՝ նրանց կողմից գնագոյացման, ծառայությունների մատուցման հետ կապված բոլոր հարցերը պարզելու համար։ Այս մասին Կառավարության այսօրվա նիստի ժամանակ ներկայացրեց ՏՄՊՊՀ նախագահ Գեղամ Գևորգյանը՝ անդրադառնալով Եգիպտոսից Հայաստան չկայացած չվերթների խնդրին:

Նա նշեց, որ ուսումնասիրությունների արդյունքում ի հայտ է եկել կարևոր մի հանգամանք։ «Մի շատ կարևոր խնդիր, որին մենք ուշադրություն ենք դարձնում. այս ավիաընկերություններն ու տուրօպերատորները փոխկապակցված ընկերություններ են, և մեր ունեցած օպերատիվ տվյալներով՝ խնդիրը նաև այստեղ է։ Հաճախ ավիատոմսի գինը կոնկրետ սպառողի համար այդքան մեծ նշանակություն չի ունենում, քանի որ նա փաթեթով է գնում, և այստեղ պետք է բացահայտենք նաև՝ արդյո՞ք հյուրանոցների համար փաթեթները ներառում են ամբողջական ծախսերը, թե՞ ոչ։ Օրինակ՝ «Էյր Կաիրո»-ի հայաստանյան ներկայացուցիչը «Անրիվա Տուրն»-է, «Ֆլայ Իջիպտ»-ինը`«Մարաթուկը»-ը  և այլն»,- ասաց Գևորգյանը։

Պաշտոնյան հավելեց, որ ՏՄՊՊՀ-ն նաև տեղեկություններ ունի, որ հարկային որոշակի պարտավորություններից խուսափելով՝ այս տուրօպերատորները որոշակի առավելություններ են ստացել և հյուրանոցի գումարը տեղում առձեռն են վճարել՝ ստանալով զեղչեր և խուսափելով հարկերից:

Մանրամասները՝ տեսանյութում։

Աղավնի Սուքիասյան