Նախարարի մամուլի քարտուղարը մեկնաբանում է Ամիրյանի ասածի և նախարարության հայտարարության անհամապատասխանությունը

«Մենք տեղյակ չենք եղել այդ ցուցադրության մասին, ես տեղեկացվել եմ այդ մասին կիսամյակային հաշվետվության ժամանակ, երբ ցուցադրությունն արդեն կայացել էր և բացումը կար, նախարարությունը տեղեկացվել է բացումից օրեր անց, մոտավորապես՝ մեկ շաբաթ հետո»,- այսօր լրագրողների հետ հանդիպման ժամանակ նման հայտարարությամբ է հանդես եկել մշակույթի նախարար Արմեն Ամիրյանը՝ անդրադառնալով Հովհաննես Թումանյանի թանգարանում բոլշևիկյան բռնաճնշումների հայ զոհերի հիշատակին նվիրված «Խավարում» խորագրով ցուցադրության փակման պատճառներին։ Այնինչ, ուսումնասիրելով մշակույթի նախարարության ֆեյսբուքյան էջը, կարող ենք նկատել, որ ցուցադրությունից դեռևս 3 օր առաջ՝ օգոստոսի 1-ին, այնտեղ տեղադրվել է ցուցադրության մասին տեղեկատվություն:

«Օգոստոսի 4-ին՝ ժամը 11:00-ին, Հովհ. Թումանյանի թանգարանի մուտքի բացօթյա տարածքում կբացվի «Խավարում» ցուցադրությունը: Ինստալացիան նվիրվում է ստալինյան բռնատիրության զոհերին: Հովհաննես Թումանյանի երեք որդիները նրանց շարքում են»,-նշված է հայտարարության մեջ:

Հակասական այս պատկերի արդյունքում հարց է ծագում՝ նախարարությունից ստու՞մ են հանրությանը, հատկապես, եթե հաշվի առնենք այն հանգամանքը, որ թանգարանի տնօրեն Նարինե Թուխիկյանն էլ իր հերթին նշել էր՝ իրենք նախարարության և ԶԼՄ-ների էջերին ուղարկել են իրենց շրջաբերականը ցուցահանդեսի բացումից դեռ օրեր առաջ, այսինքն՝ համապատասխան իրազեկում եղել է։

Թեմայի շուրջ Factor.am-ը զրուցեց Արմեն Ամիրյանի մամուլի քարտուղար Ռուզան Խաչատրյանի հետ: «Ցուցադրության մասին տեղեկությունն ու Թումանյանի որդիների լուսանկարով պաստառն ինձ թանգարանից ուղարկել են էլեկտրոնային փոստով, և ես տեղադրել եմ նախարարության ֆեյսբուքյան էջում։ Նախարարության ՊՈԱԿ-ներից ստացված տեղեկությունները տեղադրելիս երբևէ չեմ հարցնում՝ իսկ համապատասխան վարչությունը և ոլորտը համակարգող փոխնախարարը տեղեկացվա՞ծ են, համաձայնեցվա՞ծ է այսինչ միջոցառումը»,- մեկնաբանեց նա։

Մեր դիտարկմանը, թե, այնուամենայնիվ, նախարարությունն ունեցել է համապատասխան տեղեկատվություն, մամուլի քարտուղարը պատասխանեց․ «Նախարարության համապատասխան վարչությունը կամ այլ պաշտոնյա չի ստացել այդ տեղեկատվությունը, ես եմ ստացել. այն չկա սուբսիդիայի տրամադրման պայմանագրում։ Եթե ես իմանայի, թանգարանին կզգուշացնեի այդ մասին»։

Հիշեցնենք, որ Հովհ․ Թումանյանի թանգարանում «Խավարում» խորագրով ցուցադրությունը, որը պետք է տևեր մինչև ուշ աշուն, ժամանակից շուտ փակվել էր՝ Մշակույթի նախարարության կարգադրությամբ: «Զրպարտության հետևանքով ստիպված եղանք հավաքել ցուցադրությունը։ Որոշ մարդիկ դիմել են որոշակի կառույցների և ենթադրում եմ, որպեսզի գործը գլուխ գա, դիմել են շանտաժի»,- ասել էր թանգարանի տնօրեն Նարինե Թուխիկյանը։

Աննա Բաբաջանյան