22.05.2026 | 17:17
ՖԻՖԱ-ն կարևոր փոփոխություն է քննարկում ֆուտբոլում
ԼՂ հակամարտությունը ռազմական լուծում չունի. Դոնալդ Տուսկ
Քաղաքականություն
09.07.2019 | 17:50
Լեռնային Ղարաբաղի հակամարտությունը կարող է կարգավորվել միայն քաղաքական ճանապարհով, միջազգային իրավունքին և սկզբունքներին համապատասխան: Այս մասին Բաքվում հայտարարել է Եվրահանձնաժողովի նախագահ Դոնալդ Տուսկը. գրում է interfax.az-ը:
Նա նշել է, որ Ադրբեջանում հանդիպումների ընթացքում խոսել է տարածաշրջանում կայունության մասին՝ այդ համատեքստում անդրադառնալով նաև ԼՂ հակամարտությանը:
«Հակամարտության ռազմական լուծում չկա, այլ միայն քաղաքական կարգավորում՝ միջազգային իրավունքին և սկզբունքներին համապատասխան: ԵՄ-ն շարունակում է լիարժեք սատարել ԵԱՀԿ Մինսկի խմբի համանախագահների ջանքերին՝ Հելսինկյան եզրափակիչ ակտի վրա հիմնված կայուն կարգավորմամբ»,- Ադրբեջանի նախագահ Իլհամ Ալիևի հետ հանդիպման արդյունքներով ասել է Դոնալդ Տուսկը:
Նրա խոսքով՝ Բրյուսելում գնահատում են լարվածության ընդհանուր թուլացումը. «Սակայն, ինչպես համանախագահները, մենք նույնպես մտահոգված ենք շփման գծում վերջին զոհերի կապակցությամբ: Զսպվածությունը կարևոր է, ինչպես նաև խաղաղությանը նպաստող ու արդյունավետ բանակցությունների համար բարենպաստ մթնոլորտի վերականգնմանն ուղղված միջոցառումները: ԵՄ-ն պատրաստ է նպաստել ժողովուրդներին խաղաղությանը պատրաստելուն ուղղված կոնկրետ քայլերին»:
Նշենք, որ տարածաշրջանային այցի շրջանակում Դոնալդ Տուսկը կլինի նաև Հայաստանում: Վաղը Երևանում նախատեսվում է ՀՀ վարչապետ Նիկոլ Փաշինյանի և Եվրոպական հանձնաժողովի նախագահի համատեղ ասուլիսը:
