Արարատ Միրզոյանի ներկայացրած օրենքի նախագիծը որակել են մինչ օրս ներկայացված ամենաիշխանականն ու մեկ քայլ հետ․ Արման Բաբաջանյան․ ՏԵՍԱՆՅՈՒԹ

Ազգային ժողովի «Լուսավոր Հայաստան» խմբակցության պատգամավոր Արման Բաբաջանյանը խորհրդարանում ընթերցեց Հայաստանի քաղաքացիական հասարակության կազմակերպությունների խորհրդի՝ քիչ առաջ տարածած  հայտարարությունը, որտեղ նշված է, որ Արարատ Միրզոյանի առաջարկած օրենսդրական նախաձեռնությունը, որը վերաբերում է կոռուպցիայի կանխարգելման հանձաժողովի ստեղծման նոր մեխանիզմների ներդրմանը, այս կապակցությամբ առաջարկվող կարգավորումները և գործելաոճը չեն բխում միջազգային հանրաճանաչ նորմերից, սկզբունքներից, չեն արտացոլում թավշյա հեղափոխությամբ որդեգրված ժողովրդավարության և մասնակցային կառավարման արժեքները, չեն արտահայտում հակակառուպցիոն համակարգի ստեղծման վերաբերյալ ՀՀ վարչապետի հրապարակային արտահայտած դիրքորոշումները և կարող են որակվել որպես իշխանությունների կողմից մինչ օրս ներկայացված ամենաիշխանական նախագիծ և մեկ քայլ հետ։

Ի պատասխան Արարատ Միրզոմյանը նկատեց, որ իր համար այս հայտարարությունը բնական էր, քանի որ գործող օրենքով պետք է ձևավորվեր մրցութային հանձնաժողով, որտեղ թեկնածու առաջադրելու իրավունք ուներ վերը նշված հայտարարությունը տարածած հասարակական կազմակերպությունը։

«Այս ՀԿ-ի նախագահը դուստրն էլ ներկայացված է այդ հանձնաժողովում․ այնպես որ, ամեն ինչ շատ կենցաղային է»,- ասաց  ԱԺ նախագահը։

Արման Բաբաջանյանը նաև նկատեց, որ ԱԺ նախագահի առաջարկած փոփոխություններով, փաստորեն, վեթինգ իրականացնելու գործառույթը պատվիրակվում է մի մարմնի, այն դեպքում, երբ դեռ չի էլ քննարկվել անցումային արդարադատության հայեցակարգը։

«Սա անթույլատրելի է, վեթինգն ու անցումային արդարադատությունը համախոհություն են պահանջում՝ առնվազն Ազգային ժողովում, իսկ եթե այս համախոհությունը չկա, դա ռումբ է, որ դրվում է Հայաստանի դատական համակարգի տակ, դա անթույլատրելի է»,- ասաց  պատգամավորը։

Մանրամասները՝ տեսանյութում։