Լևոն Յոյլանը չպատասխանեց Արման Բաբաջանյանի աղմկոտ հայտարարություններին. ՏԵՍԱՆՅՈՒԹ

ԱԺ «Լուսավոր Հայաստան» խմբակցության պատգամավոր Արման Բաբաջանյանը խորհրդարանում Հաշվեքննիչ պալատի 2018 թվականի հաշվետվության քննարկման ժամանակ ուշագրավ ելույթ ունեցավ, որը վերաբերում էր կառույցի նախագահ Լևոն Յոլյանին:

«Ես կանգ կառնեմ մի ցցուն փաստի վրա. պարոն Յոլյանն էներգետիկայի նախարարի պաշտոնին է նշանակվել 2016 թվականին, փառք Աստծո՝ կարճ ժամանակով: Այս ուսումնասիրության մեջ ոչ մի խոսք չկա նախարարի պաշտոնում նրա կողմից գործված թալանի մասին «Բարձրավոլտ էլեկտրական ցանցերում», նրա անմիջական մասնակցությամբ և իմացությամբ տեղ են գտել խայտառակ բացթողումներ ԲԷՑ-ում, փոխարենը պարոն Յոլյանն այս հաղորդման մեջ ներկայացնում է ուսումնասիրություն՝ սկսած 2018 թվականից, և դուրս է թողնում իր պաշտոնավարման ընթացքում կատարված ապօրինությունները»,- ասաց նա:

Բաբաջանյանը հիշեցրեց, որ Յոլյանն օրեր առաջ ասել է՝ ինքն ու իր հետ փոխկապակցված անձինք մի քանի տարի է՝ բիզնեսով չեն զբաղվում: Պատգամավորը մի շարք ընկերությունների անուններ թվարկեց, որոնցում համասեփականատեր են Յոլյանը կամ նրա կինը՝ հարցնելով, թե նրան ծանո՞թ է այդ ընկերությունը: «Ի՞նչ եղավ 2015 թվականի Գեղարքունիքի մարզի Կութ գյուղում նախատեսված ոսկու հանքավայրի հետ, Ձեր կնոջ՝ Անուշ Ասլանյանի գլխավորած ՍՊԸ-ն ծրագրել էր զբաղվել ոսկու արդյունահանմամբ: Ի՞նչ միջոցներով էիք ձեռնարկել այս բիզնեսը: Պարո՛ն Յոլյան, չեմ գտնում, որ Ձեզ այստեղ հաղորդում տալու և ԱԺ հարցերին պատասխանելու առիթ պիտի տրվեր: Ես անարժանապատիվ մի բան եմ տեսնում այստեղ»,- ասաց նա:

Պատգամավորը շեշտեց՝ այդ հարցերին պիտի պատասխանի իշխանությունը: Նա հույս հայտնեց, որ այս քննարկման ընթացքում կլսեն բարձրացված հարցերի սպառիչ պատասխանները, այլապես ստիպված են լինելու արձանագրել, որ նոր Հայաստանում ոչ միայն չեն բացահայտվում անցյալի հանցավոր դրվագները, այլև թույլ է տրվում, որ դրանց մասնակիցները կարևոր պաշտոն զբաղեցնեն:

«Յոլյանն ամբողջությամբ համապատասխանում է քրեաօլիգարխիկ համակարգի ներկայացուցչի չափանիշներին, Ձեզ կոչ եմ անում ամփոփիչ ելույթը հրաժեշտի տեքստ դարձնել, չենք կարող այս կարևորագույն ինստիտուտը, որտեղ փայլուն մասնագետներ են աշխատում, այսպիսի արատավոր բեռով շարունակեք ղեկավարել: Ես Ձեզ իմ կողմից հայտարարում եմ պերսոնա նոն գրատա և ասում եմ՝ հաջողություն»,- ասաց Բաբաջանյանը:

Լևոն Յոյլանը լրագրողների հետ զրույցում հրաժարվեց մեկնաբանել այս հայտարարությունը կամ պատասխանել ցանկացած այլ հարցի: Նշեց միայն, որ շարունակելու է պաշտոնավորել:

Մանրամասները՝ տեսանյութում:

Նարեկ Կիրակոսյան