Արձանագրվել են միլիարդավոր դրամների հասնող անհամապատասխանություններ, կան խեղաթյուրման բազմաթիվ փաստեր. Լևոն Յոլյանը ոլորտներ է թվարկում․ ՏԵՍԱՆՅՈՒԹ

Ազգային ժողովում այսօր Հաշվեքննիչ պալատի նախագահ Լևոն Յոլյանը ներկայացրեց պալատի 2018 թվականի տարեկան հաշվետվությունը։ Ըստ պալատի նախագահի՝ արձանագրվել են միլիարդավոր դրամների հասնող անհամապատասխանություններ, կան խեղաթյուրման բազմաթիվ փաստեր, պալատը, ընդհանուր առմամբ, նեկայացրել է 359 տարաբնույթ առաջարկություն։

Լևոն Յոլյանի ներկայացմամբ՝ 2018թ. 25 հաշվեքննությունից ավարտված է 19-ը, 2-ը կասեցված է, իսկ 4-ի մասով աշխատանքները շարունակվում են: Դրանք վերաբերում են ՊՆ-ին, «Հայաստան» համահայկական հիմնադրամին, Հայ-ռուսական համալսարանին և դեղերի շրջանառության պետական կարգավորմանն ուղղված ֆինանսատնտեսական հաշվետվություններին:

Հաշվեքննիչ պալատի ղեկավարը նշեց, որ այս հաշվեքննության ընթացքում եղել են նաև առերևույթ հանցագործության հատկանիշներ պարունակող կասկածներ, դրանց մասով 5 առանձին ուղղություններով նյութեր ուղարկվել են Գլխավոր դատախազություն։

Յոլյանն անդրադարձավ նաև Քաղավիացիայի վարչության վերաբերյալ արված բացահայտումներին՝ նշելով, որ ամեն տարի պետական բյուջեից «Ավիաուսումնական կենտրոն» ՓԲԸ-ին միջոցներ են հատկացվում ուսանող օդաչուների ուսումնավարժանքային թռիչքների իրականացման համար, օդանավի վարձակալության համար պետական ընկերությունը վճարել է 600 մլն դրամ, իսկ մինչև այդ՝ օդանավն ընկերությունը ներմուծել է 2013-ին՝ 86.2 մլն դրամով և վարձավճարը 7 անգամ ավելի է, քան օդանավի արժեքը:

Հաշվեքննիչ պալատի նախագահը թվարկեց նաև թոշակների, նպաստների և այլ ոլորտներում արձանագրված խախտումները, որոնք ներկայացված են պալատի հաշվետվության մեջ։

Մանրամասները՝ տեսանյութում։