Պետք է հակազդել Ռոբերտ Քոչարյանի կնքահայրությամբ հաստատված և Սերժ Սարգսյանի կողմից խորացված անարխիայի տարածմանը․ Արման Բաբաջանյան․ ՏԵՍԱՆՅՈՒԹ

Հայաստանը ներկայում գտնվում է դատաիրավական արմատական բարեփոխումների անհրաժեշտության առաջ: Հայտարարվել է դատական իշխանությունը վեթինգի ճանապարհով զտելու կամ ատեստացիայի ենթարկելու ու դատաիրավական համակարգը վիրահատական միջոցով առողջացնելու անհրաժեշտության մասին: Հայտարարվել է այն բանից հետո, երբ առանձին վերցրած մեկ դատական գործով ի ցույց դրվեց Հայաստանի դատական համակարգի ճղճիմ և կախյալ վիճակը, դատարանների՝ ամենատարբեր ազդեցություններին տուրք տալու երևույթը:

Այս մասին այսօր Ազգային ժողովում ՍԴ դատավոր Վահե Գրիգորյանի թեկնածության քննարկման ժամանակ ասաց  ԱԺ «Լուսավոր Հայաստան» խմբակցության պատգամավոր Արման Բաբաջանյանը։

Վերջինս պատգամավորներին խորհուրդ տվեց իրերը կոչել իրենց անուններով և տեսնել, որ հեղափոխությունից մեկ տարի անց մեր երկրի ինքնիշխանությունը նսեմացրած քրեաօլիգարխիկ համակարգի կնքահայրը ապացուցեց, որ ի զորու է ազդել ՀՀ դատարանների վրա։

«Այդ մեղադրյալը շարունակում է դա ապացուցել նաև այսօր՝ դատարանում ցուցաբերելով ցինիզմի հասնող ինքնավստահություն՝ առնվազն տեսանելի մակարդակում բարոյական և հոգեբանական ճնշում գործադրելով դատարանի վրա»,- ասաց պատգամավորը՝ շեշտելով, որ այդ պայմաններում պետք է հակազդել Ռոբերտ Քոչարյանի կնքահայրությամբ հաստատված և Սերժ Սարգսյանի կողմից խորացված անարխիայի տարածմանը:

«Հետևաբար, այս քվեարկությունն ինձ համար երկրում ստեղծված ընդհանուր համատեքստից բխող քայլ է, և ուրեմն այս քննարկումն ու քվեարկությունը ոչ թե իրավական, այլ քաղաքական, ամբողջությամբ քաղաքական ակտ է: Հետևաբար, մեր եզրահանգումները նույնպես պետք է ունենան քաղաքական բովանդակություն և հիմնավորում»,- ասաց նա:

Մանրամասները՝ տեսանյութում։