Ալեն Սիմոնյանի դեմ հանցագործության մասին հաղորդում է ներկայացվել ՀՔԾ․ Դանիել Իոաննիսյան․ ՏԵՍԱՆՅՈՒԹ

Փաստերի ստուգման հարթակի՝ «Fip.am»-ի արձանագրած փաստերի հիման վրա ՀՔԱՎ գրասենյակը ԱԺ փոխնախագահ Ալեն Սիմոնյանի դեմ հանցագործության մասին հաղորդում է ներկայացրել ՀՔԾ։

Այս մասին Factor.am-ի հետ զրույցում ասաց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը․

«Մեր կոլեգաները հայտնաբերել են, որ Ալեն Սիմոնյանի հայտարարագրում պաշտոնը ստանձնելու դրությամբ գույքի հայտարարագրում գրված է ո՛չ այն տրանսպորտային միջոցը, որը գրված է պաշտոնը ստանձնելու օրվա դրությամբ, այլ մեկ ուրիշ տրանսպորտային միջոց, որը ավելի թանկ էր և ձեռք էր բերվել պաշտոնավարման օրոք արդեն։ Ալեն Սիմոնյանը պաշտոնը ստանձնել է Mitsubishi ավտոմեքենայով, որն արժեր 10-ից 11 հազար դոլար, պաշտոնավարման ժամանակ ձեռք է բերել Range rover, որն արժեր 25 500 ԱՄՆ դոլար, բայց պաշտոնը ստանձնելու հայտարարագրում գրել է արդեն Range rover ավտոմեքենան, թեև ինքը պետք է գրեր Mitsubishi-ն։ Որպեսզի իր հնարավոր հարստացումը երևար իր տարբեր հայտարարագրերի մեջ, ու որ հասարակությունը և իրավապահները հնարավորություն ունենային հասկանալ՝ Ալեն Սիմոնյանը պաշտոնավարման ժամանակ իր գույքային դրությունը որքանով է բարելավել, որքանով՝ ոչ, և արդյոք այդ բարելավումը կարող էր պայմանավորված լինել իր աշխատավարձով, թե՞ ոչ»,- նշեց Դանիել Իոաննիսյանը։

Նրա խոսքով՝ Հատուկ քննչական ծառայությունից ակնկալում են քրեական գործի հարուցում կեղծ հայտարարագիր ներկայացնելու հիմքով։ Ըստ Իոաննիսյանի՝ Ալեն Սիմոնյանը կարող էր իմանալ, որ պետք է գույքի մասին հայտարարագրում նշում անի պաշտոնը ստանձնելու օրվա, և ոչ թե հայտարարագիրը լրացնելու դրությամբ․ «Նա պետք է արտացոլեր Mitsubishi-ն, և ոչ թե Range rover ավտոմեքենան»,- նշեց նա։

Նշենք, որ հունիսի 5-ին Factor.am-ի հետ զրույցում Ալեն Սիմոնյանը զարմանք էր արտահայտել, թե ինչու Դանիել Իոաննիսյանի թիմը չի դիմել ՀՔԾ։ Ալեն Սիմոնյանի մեկնաբանությունը՝ ՀՔԾ հանցագործության մասին հաղորդում ներկայացնելու մասին, Factor.am-ը կներկայացնի քիչ անց։

Մանրամասները՝ տեսանյութում։

Ռոբերտ Անանյան