Վանաձորի այգիների ու պուրակների բարեկարգման համար այս տարի կտրամադրվի 140 մլն դրամ

Վանաձորի 4 այգիներից ներկայում քիչ թե շատ բարեկարգ են Հրանտ Մաթևոսյանի և Ռուբեն Սևակի անունը կրող զբոսայգիները: Երկուսն էլ տրված են վարձակալությամբ:

Ի տարբերություն այս այգիների՝ Սայաթ-Նովայի անվան զբոսայգին վարձակալ չունի, նախկին վարձակալի հետ քաղաքապետարանը  դատական գործընթացների մեջ է, իսկ Շառլ Ազնավուրի անվան այգին շարունակում է համարվել ամենաանմխիթար և անբարեկարգ պայմաններն ունեցող զբոսայգին: Այս տարածքը նույնպես վարձակալ չունի, այն ամբողջությամբ գտնվում է համայնքի ենթակայության ներքո:

Այգիների վիճակից Վանաձորի գլխավոր ճարտարապետ Սուրեն Աբովյանը գոհ չէ, սակայն վստահ է, որ սուբվենցիոն ծրագրերի շնորհիվ առաջիկայում Վանաձորը նույնպես կունենա բարեկարգ պուրակներ ու այգիներ. «Այս պահին անբավարար է մեր այգիների վիճակը: Բայց տարեվերջին՝ սուբվենցիաների ավարտից հետո, հուսով եմ՝ պատկերի բավականին փոփոխություն կունենանք, որովհետև լայնամասշտաբ աշխատանքներ են նախատեսվում»:

Այգիների ու պուրակների բարեկարգումը ներառված է այս տարվա սուբվենցիոն ծրագրում: Աշխատանքների իրականացման համար նախատեսվել է 140 մլն դրամ: Աբովյանի խոսքով՝ սա անկախությունից հետո առաջին դեպքն է, երբ այգիների բարեկարգման համար այսքան գումար է ներդրվում:

«Այդ ծրագրի մեջ ներառված է Ռուբեն Սևակի անվան այգին, որտեղ նախատեսվում է բավականին լայնածավալ բարեկարգում: Ծրագրում ընդգրկված են նաև Արցախ պուրակը, Հարապետության պուրակը և Պատկերասրահի դիմացի փոքր պուրակը: Բացի այդ՝ փոքր մրցույթ ունենք հայտարարած՝ Շառլ Ազնավուրի անվան այգու հետ կապված: Թեև լրատվամիջոցներով  նաև ավագանու անդամներն անհանգստություն հայտնեցին, որ այդտեղ պետք է շենք կառուցվի և այլն, ես պաշտոնապես ասում եմ՝ այդտեղ ոչ մի շենք չի կառուցվելու: Այդտեղ միայն բարեկարգում է նախատեսվում՝ ճեմուղիներ, ծաղկանոց, նստարաններ, խաղահրապարակ: Նախագծերը պատրաստ են, հիմա սպասում ենք սուբվենցիաների երկրորդ փուլի պատասխանն էլ գա, որ միանգամից մրցույթները հայտարարենք»,- ասաց նա:

Ճարտարապետը նշեց, որ այժմ աշխատանքներ են իրականացնում՝ կապված Սայաթ-Նովայի անվան այգու հետ, որպեսզի ստանան համայնք

ային վկայական. «Այս այգու վերաբերյալ կան ներդրումային ծրագրեր, հետաքրքրվողներ, բայց այդ խնդրի պատճառով ոչինչ չենք կարողանում անել: Իսկ Հրանտ Մաթևոսյանի անվան այգում ունենք տարիներով վարձակալությամբ տրված տարածքներ, որտեղ ոչինչ չի արվում: Հիմա մի քանի հոգի դիմել են, տեսնենք՝ ոնց կստացվի»:

Սուրեն Աբովյանը տեղեկացրեց, որ այգով հետաքրքրված է ևս մեկ անձ, որը նախատեսում է տարածքում կառուցել ողջ տարին գործող սահադաշտ: Նախագիծն առաջիկայում կդրվի քննարկման: Այգու հետ կապված այլ ծրագրեր այս տարի չեն նախատեսվում:

«Այս այգին էլ վարձակալ ուներ, 3 ամիս առաջ ենք խզել պայմանագիրը: Այդ պատճառով էլ մինչև հիմա դժվար էր այդտեղ որևէ գործ անել: Հիմա, ինչքանով տեղյակ եմ, այստեղ կոմունալ տնտեսության բաժինը նախատեսում է մաքրել, վտանգավոր կարուսելները ապամոնտաժել»,- ասաց ճարտարապետը:

Տաթևիկ Ղազարյան