14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Վահե Գրիգորյանի հնարավոր ընտրությունը չի նշանակում յուրայինի գործուղում ՍԴ. Արարատ Միրզոյան. ՏԵՍԱՆՅՈՒԹ
Քաղաքականություն
31.05.2019 | 14:54
Վահե Գրիգորյանի առաջադրումը և հնարավոր ընտրությունը չի նշանակում յուրայինի գործուղում Սահմանադրական դատարան: Ազգային ժողովում լրագրողների հետ զրույցում ասաց ԱԺ նախագահ Արարատ Միրզոյանը։
«Վահե Գարիգորյանի թեկնածության առաջադրումը և, գուցե, հավանական ընտրությունը բոլորովին չի նշանակում գործող իշխանությունների կողմից, այսպես ասած, յուրայինի, թիմակցի գործուղում ՍԴ: Եթե Վահե Գրիգորյանն ընտրվի, լինելու է անկախ ՍԴ դատավոր: Վահե Գրիգորյանին ընտրելը չի նշանակում՝ մեր մարդն ունենալ, այդ մարդիկ պետք է լինեն անկախ, այդ կառույցը պետք է լինի անկախ»,- շեշտեց Միրզոյանը:
ԱԺ նախագահն ասաց՝ չափազանց դրական է վերաբերվում Վահե Գրիգորյանի թեկնածությանը, իսկ թե ինչպիսին կլինի խմբակցության վերաբերմունքը, պարզ կդառնա առաջիկայում:
«Ես մոտ հարաբերություններ ունեմ Վահե Գրիգորյանի հետ, և դա ձևավորվել է բազմաթիվ տարիներ առաջ, երբ մենք տարբեր եղանակային պայմաններում տարբեր հարցերով ընդվզման շարժումներ էինք անում, հայտնվում էինք ոստիկանական բաժանմունքներում, և այդտեղ մեզ հետ էին տարբեր իրավապաշտպաններ, այդ թվում՝ Վահե Գրիգորյանը: Կարծում եմ՝ նորմալ է, որ մենք այդ տարիներից սկսած, այդպիսի հանգամանքներում ծանոթանալով՝ կարողացել ենք մտերիմ հարաբերություններ ձևավորել: Իհարկե՝ չափազանց մեծ դեր է խաղում այն, որ արժեհամակարգի առումով, երկրի զարգացման տեսլականի առումով, երկրի մասին ունեցած երազանքի առումով բավական մեծ ընդհանրություններ կան»,- շարունակեց օրենսդիրի ղեկավարը։
Այսօր հայտնի դարձավ, որ Սահմանադրական դատարանի դատավորի պաշտոնում նախագահ Արմեն Սարգսյանն առաջադրել է փաստաբան Վահե Գրիգորյանին։
Մանրամասները՝ տեսանյութում։
Շողիկ Գալստյան
