«Կրկեսի վերածված դատարան»․ դատարանից հեռացվել է Արայիկ Խանդոյանը, պաշտպանի նկատմամբ՝ սանկցիա կիրառվել

 Ավան և Նոր Նորք վարչական շրջանների ընդհանուր իրավասության առաջին ատյանի դատարանում ընթացող «Սասնա ծռերի» գործով այսօրվա դատական նիստում ևս վերստին եղան սանկցիաներ և նիստերի դահլիճից հեռացում: Դատարանը սանկցիա կիրառեց գործով ամբաստանյալ Արայիկ Խանդոյանի պաշտպան Արայիկ Պապիկյանի նկատմամբ այն բանի համար, որ Պապիկյանը դատարանին գրավոր գրություն ուղարկելուց հետո հեռացել էր նիստերի դահլիճից:

«Երկու պատճառ եմ գրել ու գրավոր ընթացակարգով ներկայացրել դատարանին, թե ինչու լքեցի դահլիճը։ Առաջինը․ իմ պաշտպանյալին՝ Արայիկ Խանդոյանին կամայականորեն հեռացրին նիստերի դահլիճից։ Երկրորդ՝ իմ զննության ժամանակ մետաղորսիչի ձայնային ազդանշանները բազմաթիվ էին, ինձ ներս թողեցին, սակայն նույն կերպ էր նաև այլ փաստաբանների պարագայում: Սակայն վերջիններիս ներս չթողեցին, այսինքն՝ խտրական մոտեցում էր մի մասին թողնելը, մյուսին՝ ոչ»,- Factor.am-ի հետ զրույցում ներկայացրեց Արայիկ Պապիկյանը։

Փաստաբանի խոսքով՝ նիստի ընթացքում նա փորձել է դատավորին այդ մասին ասել, սակայն խոսելու հնարավորություն չստանալով ՝ հարցը գրավոր է ներկայացրել:

«Գրավոր ներկայացրի, որ ինքն աջակցում է հրահանգավորված, ապօրինի դատավարությանը, ուստի նման պայմաններում չեմ պատրաստվում մասնակցել դատավարությանը»,-ասաց Պապիկյանը։

Դատական նիստի ժամանակ հեռացվել է Արայիկ Պապիկյանի պաշտպանյալը՝ Արայիկ Խանդոյանը, ուստի գրության երկրորդ հատվածը վերաբերել է Խանդոյանի՝ նիստերի դահլիճից հեռացվելուն: «Դատարանն այնքան արագ որոշեց հեռացնել Խանդոյանին, որ անհասկանալի էր, ըստ երևույթին` տեղից խոսելու համար էր, բայց Խանդոյանի վերջին խոսքն այն էր, որ ջուր է ուզում»,- ասաց Պապիկյանը՝ հավելելով, որ դատարանը որոշում է կայացրել վեց ժամով հեռացնել իր պաշտպանյալին։

Արայիկ Պապիկյանն աննախադեպ է որակում այն իրավիճակը, երբ փաստաբանը գտնվում է նիստերի դահլիճում, սակայն ստիպված է ասելիքը գրավոր փոխանցել դատավորին․ «Դատավարությունը շարունակվում է այն նույն սցենարով, ինչն արդեն 2-3 ամիս է` գործում է, ոչինչ չի փոխվել և սրտի ցավով եմ ասում՝ շարունակում ենք ունենալ կրկեսի վերածված դատարան»,- եզրափակեց նա։

Սեդա Ղուկասյան