Դոն Պիպոն՝ Ջիվան Աբրահամյանի մասնակցությամբ ցույցն իր կողմից ուղղորդելու և Հայաստանից հեռանալու մասին

Մամուլն այսօր գրել էր, որ օրերս Ազատության հրապարակում հանուն անկախ դատական համակարգի անցկացված հանրահավաքի կազմակերպիչներից Ջիվան Աբրահամյանն ուղղորդվում է Դոն Պիպո անունով հայտնի Արթուր Ասատրյանի կողմից։ Թեմայի շուրջ Factor.am-ը զրուցել է Արթուր Ասատրյանի հետ:

– Պարո՛ն Ասատրյան, մամուլն այսօր գրել է, որ Դուք եք ուղղորդում Ջիվան Աբրահամյանին՝ բողոքի ակցիաներ կազմակերպելու համար: 

– Հերքում եմ: Ես Ջիվան Աբրահամյանին չեմ ճանաչում, ոչ էլ դեմքով  եմ տեսել։

– Ասվում է, որ նախկինում էլ Էջմիածնում եք ուղղորդել նրա մասնակցությամբ հավաքները՝ ընդդեմ նախկին պատգամավոր, գեներալ Մանվել Գրիգորյանի:

– Ես այդ տղայի քեռուն եմ ճանաչում ընդամենը, որն Էջմիածնից է: Իսկ Ջիվանին ո՛չ տեսել եմ, ո՛չ հետը շփվել: Եթե կլինի մեկը, ով կհաստատի, որ ես երբևէ առնչություն եմ ունեցել Ջիվան Աբրահամյանի հետ, ես ինձ կհամարեմ ամենաստոր մարդը:

– Այդ դեպքում՝ ինչո՞ւ են Ձեզ կապում օրեր առաջ տեղի ունեցած ցույցի և Ջիվանի հետ։

– Նենգությունը մարդկանց մեջ էնքան շատ է… Ո՛չ այս երկրում փող եմ աշխատում, ո՛չ բացի լավ բանից՝ որևէ այլ բան եմ անում։ Չեն հասկանում, որ ես քաղաքականության մեջ չկամ, և ուզում են ինձ Նիկոլ Փաշինյանի մոտ սևերես անեն։ Իտալիայից եկել  եմ ու հիմա ստիպված 11 ամիս պետք է սպասեմ: Երբ իմ գործը վերջացավ, գնալու եմ այստեղից։

– Ասում եք՝ Հայաստանում ստիպված եք մնում: Հիասթափվա՞ծ եք:

– Հայաստանից հիասթափված չեմ, մարդկանցից եմ հիասթափված։ Ես Հայաստանի համար ինչ կարողանում եմ՝ անում եմ: Իհարկե, դա չեմ անում, որ գովազդեն ու բարձրաձայնեն, դրա կարիքը երբեք չեմ ունեցել և չունեմ։ Այնպես որ՝ իմ գործը հենց փակվեց, առաջիկա հինգ տարիներին ես կլինեմ Իտալիայում:

Աղավնի Սուքիասյան