Եթե նախագահն ասում է՝ ԵՄ-ի հետ համաձայնագիրը չստորագրելու պատճառ չկա, ուրեմն համոզել է Ռուսաստանին. Արեգ Գալստյան

Երկու ռազմավարական գործընկեր պետությունների հարաբերություններում հնարավոր է և՛ ճնշում լինի, և՛ շանտաժ, սա նորմալ է աշխարհի բոլոր պետությունների պարագայում: Այլ հարց է, որ Հայաստանի կողմից նման դեպքերում պատասխան քայլերը բացակայում են: Factor.am-ի հետ զրույցում նման տեսակետ հայտնեց Պատմական գիտությունների թեկնածու, The National Interest, Forbes, The Hill և American Thinker պարբերականների մշտական հեղինակ ու փորձագետ Արեգ Գալստյանը՝ խոսելով Ռուսաստան-ԱՄՆ, Ռուսաստան-Եվրամիություն հարաբերությունների և Հայաստանի վրա դրանց հնարավոր անդրադարձի մասին :

«Եթե քեզ ճնշում են, և դու ուղղակի ենթարկվում ես այդ ճնշումներին, ուրեմն դա քո խնդիրն է, որ թույլ ես տալիս հետդ այդպես խոսեն»,- նկատեց փորձագետը: Ինչ վերաբերում է Հայաստան-Եվրամիություն հարաբերություններին և աշնանն ակնկալվող Համապարփակ և ընդլայնված գործընկերության համաձայնագրի ստորագրմանը, փորձագետն ասաց՝ ժամանակը ցույց կտա, եթե չստորագրեն համաձայնագիրը, այդ ժամանակ էլ հնարավոր կլինի համապատասխան եզրակացություն անել:

«Ես կարծում եմ, որ նախագահ Սերժ Սարգսյանն ու վարչապետ Կարեն Կարապետյանը համաձայնագրի ստորագրման մասին վստահ հայտարարում են, քանի որ համաձայնեցրել են Մոսկվայի հետ, ես վստահ եմ: Եթե նախագահն ասում է՝ ԵՄ-ի հետ համաձայնագիրը չստորագրելու պատճառ չկա, ուրեմն ստացվել է համոզել Ռուսաստանին , որ դա ԵՏՄ-ին դեմ չէ»,- կարծիք հայտնեց Արեգ Գալստյանը:

Մեր հարցին՝ անգամ եթե նման համաձայնություն կա, դա կարո՞ղ է երաշխիք լինել այն բանի, որ, օրինակ, երկու ամիս անց Ռուսաստանը դիրքորոշումը չի փոխի, Գալստյանի պատասխանեց` ոչ:

Առավել մանրամասն՝ տեսանյութում:

Շողիկ Գալստյան