02.07.2026 | 02:50
ԱԱ-2026. Բելգիան կամային հաղթանակ տարավ 0:2-ից հետո. ՏԵՍԱՆՅՈՒԹ
ԵԱՀԿ երևանյան գրասենյակի փակմամբ Ադրբեջանը հայտնվել է իզոլացման մե՞ջ
09.05.2017 | 16:27
Արտաքին գործերի փոխնախարար Կարեն Նազարյանի գնահատմամբ՝ ԵԱՀԿ երևանյան գրասենյակի փակումից հետո «Ադրբեջանն ամբողջությամբ գտնվում է իզոլացման մեջ»։
«ԵԱՀԿ երևանյան գրասենյակի փակման մասին ԱԳՆ խոսնակը արդեն հանդես է եկել համապատասխան հայտարարությամբ․ գործընթացը ցույց տվեց, որ Ադրբեջանն ամբողջությամբ գտնվում է իզոլացման մեջ։ Ե՛վ քարտուղարության, և՛ համանախագահ երկրների կողմից հսկայական քննադատական ալիք է ուղղվել»,- Factor.am-ի հետ զրույցում նշեց փոխնախարարը։
Կարեն Նազարյանի համոզմամբ՝ Ադրբեջանի կողմից նման գործելաոճը «չի կարող նպաստել արդյունավետ համագործակցությանն առհասարակ»: «Ադրբեջանի ոչ կառուցողական կեցվածքը չի ստեղծում այն նպաստավոր պայմանները, որի շրջանակում պետք է իրականացվի ԼՂ հակամարտության կարգավորման գործընթացը»,-նկատեց նա։
Հարցին, թե այսուհետ ո՞վ է ԵԱՀԿ-ի կողմից ֆինանսավորվող ծրագրերն իրականացնելու, փոխնախարարը վստահեցրեց, որ ծրագրերը դեռ կշարունակվեն․ «ԵԱՀԿ անդամ երկրների կողմից քննարկվում է Հայաստանի հետ համապատասխան լուծում գտնելու տարբերակը, և ես վստահ եմ, որ այդ բացը կլրացվի»։
Փոխնախարարը չհամաձայնեց այն քննադատություններին, որ ՀՀ ԱԳՆ-ի բացթողման խնդիրն է նաև ԵԱՀԿ երևանյան գրասենյակի փակման պատճառը: «Թույլ տվեք չհամաձայնել այդ տեսակետների հետ, որովհետև ԵԱՀԿ մշտական խորհրդի վերջին նիստի ժամանակ, որի ընթացքում քննարկվել է այդ հարցը, հակառակը՝ անդամ երկրների կողմից դրվատանքի խոսքեր են հնչել Հայաստանի Հանրապետության հասցեին»,- եզրափակեց նա։
