Ես բազմիցս ասել եմ մեր մոտեցումը. Արսեն Թորոսյանը՝ «Ժպիտների քաղաք» հիմնադրամին ծխախոտի վաճառքից գումար փոխանցելու մասին. ՏԵՍԱՆՅՈՒԹ

Մարդու պապիլոմա վիրուսի դեմ գարդասիլ պատվաստանյութի շուրջ նոր աղմուկ է բարձրացել: Քննարկվում է այն, որ դրսում, մասնավորապես՝ ԱՄՆ-ում, կա ավելի որակյալ պատվաստանյութ, քան Հայաստանում եղածներն են: Factor.am-ն առողջապահության նախարար Արսեն Թորոսյանից հետաքրքրվեց՝ ինչու՞ որակյալ պատվաստանյութը Հայաստան չի հասնում, եթե, իհարկե, այդ տեղեկությունները ճիշտ են:

«Խոսքը որակի մասին չէ, այլ շտամների քանակի, որոնք կան երկու պատվաստանյութերի միջև: Կա «գարդասիլ 4», որն օգտագործվում է Հայաստանում, և կա «գարդասիլ 9»: «Գարդասիլ 4»-ի մեջ կան այն հիմնական շտամները, որոնք առաջացնում են քաղցկեղ, իսկ «գարդասիլ 9»-ի մեջ կան ավելի շատ շտամներ: Պատվաստանյութի ներդրմանը զուգընթաց՝ շատ հնարավոր է, որ մենք էլ անցնենք «գարդասիլ 9»-ին: Չունենալով 9-ը՝ չի նշանակում, որ մենք չպետք է պատվաստենք 4-ը»,- ասաց առողջապահության նախարարը:

Մեր հարցին ի պատասխան՝ Արսեն Թորոսյանն ասաց, որ այս երկու պատվաստանյութերի տարբերությունը միայն վիրուսների քանակի մեջ է: Ըստ նրա՝ երկուսն էլ նույն որակն ունեն:

Վերջերս ՀՀ վարչապետի տիկնոջ՝ Աննա Հակոբյանի կողմից ղեկավարվող «Ժպիտների քաղաք» հիմնադրամը ծխախոտի արտադրությամբ զբաղվող ընկերություններին առաջարկել էր մեկ տուփ ծխախոտի վաճառքից մեկ դրամ փոխանցել հիմնադրամին, որը զբաղվում է մանկական քաղցկեղի բուժմամբ: Առողջապահության նախարար Արսեն Թորոսյանը Factor.am-ին տված հարցազրույցում սա անթույլատրելի էր համարել, իսկ ահա հիմնադրամի հոգաբարձուների խորհրդի անդամ Գևորգ Թամամյանը հայտարարել էր, որ նախարարը թող բոլորին ապահովի համապատասխան դեղորայքով և նոր միայն նման հայտարարություններ անի: Factor.am-ն Արսեն Թորոսյանից հետաքրքրվեց՝ ինչպե՞ս է վերաբերվում այս հայտարարությանը: Ուշագրավն այն է, որ և՛ Թորոսյանը, և՛ Թամամյանը նույն հիմնադրամի հոգաբարձուների խորհրդի անդամներ են:

«Ես բազմիցս ասել եմ մեր մոտեցումը: Հայաստանում քաղցկեղի բուժման համար ամեն տարի ավելի շատ գումար է հատկացվում»,- ասաց նա:

Մանրամասները՝ տեսանյութում:

Նարեկ Կիրակոսյան