Մարդիկ կան՝ նախանձում են, որ ես ընտրվել եմ ԵԿՄ նախագահ. Սասուն Միքայելյան

Factor.am-ի հարցազրույցը ԱԺ պատգամավոր, ԵԿՄ նախագահ Սասուն Միքայելյանի հետ

– Պարո՛ն Միքայելյան, երեկ հայտարարեցիք, որ պայմանագրային ծառայության համար դիմում են անձինք, ովքեր ալկոհոլային խմիչքի հանդեպ անտարբեր չեն: Ձեր այս հայտարարությամբ ի՞նչ էիք ցանկանում ասել: Այսինքն՝ հիմա պաշտպանությունը թու՞յլ է:

– Ո՛չ, դա առաջնագծի հարց չէ: Պայմանագրային զինծառայողները որոշ մասում են պաշտպանություն իրականացնում: Մենք պետք է այսօր պայմանագրային ծառայությունն էլ տանենք դեպի պրոֆեսիոնալիզմ, պետությունը նրանց հետ կապված նոր ծրագիր պետք է մշակի: Նախկինում պայմանագրային ծառայությունը ճիշտ հիմքերի վրա չի դրվել, որը պետք է կարգավորվի: Սա է եղել իմ ասածը:

– Ձեր ելույթը քննադատվեց, հնչեցին կարծիքներ, որ Դուք պատերազմի ուղով անցած մարդ եք, բայց անթույլատրելի հայտարարություններ եք անում: Ինչպե՞ս կմեկնաբանեք սա:

– Մի տեսակ թյուրընկալում եղավ, որովհետև ես խոսում էի Ազգային ժողով ներկայացրած նախագծի շրջանակում, ըստ որի՝ զինվորը զինվորական պատրաստություն պետք է անցնի ծառայության մեկնելուց մեկ տարի անց: Եթե մենք նման փոփոխության գնանք, մեկ զորակոչ դուրս ենք թողնում: Այսօր ով ինչ նախագիծ ասես՝ բերում է՝ չհամաձայնեցնելով Պաշտպանության նախարարության հետ: Թող ինձ ներեն իմ գործընկերները, չգիտեմ՝ դա պոպուլի՞զմ է, թե՞ սրտացավություն, բայց այսօրվա իրավիճակից ելնելով՝ նման փոփոխությունների չենք կարող գնալ:

– Ձեզ քննադատում են նաև անձինք, ովքեր մարտական ուղի են անցել:

– Ես չեմ ուզում առայժմ իմ ընկերներին մեկնաբանեմ, թե ով, ինչպես, ոնց: Մենք նման բաներից պետք է զերծ մնանք: Մի քանի օր առաջ, եթե հիշում եք, պատերազմ անցած տղաներին հանեցին իրար դեմ: Մարդ կա, որ այսօր իր անցած մարտական ուղին ուզում է բերի՝ իր ճարտար լեզվի, խոսքի վրա ձևավորի: Ամեն մեկս էլ մյուսի մարտական ուղին գիտի, պետք չի ճարտար լեզվով մարտական ուղի փորել: Ես բոլորին կոչ կանեի համախմբման, ոչ թե նման քննադատություններ անելու: Այսօր, որ ես ընտրվել եմ ԵԿՄ նախագահ, կան մարդիկ, որ նախանձում են: Կա նեղացկոտություն, բայց ես առաջարկում եմ համախմբվել:

Հարցազրույցն ամբողջությամբ՝ տեսանյութում:

Նարեկ Կիրակոսյան