10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
ՀՀ հնագիտության զարգացման ծրագրով նախատեսվում է 22 միջոցառում իրականացնել
Մշակույթ
24.08.2017 | 16:11
ՀՀ կառավարությունը 2017 թվականի օգոստոսի 10-ի նիստի N 34 արձանագրությամբ հավանության արժանացրեց Հայաստանի Հանրապետության հնագիտության զարգացմանը նպաստող միջոցառումների 2017-2025 թվականների ծրագիրը և ժամանակացույցը:
Ծրագրի նպատակն է Հայաստանի Հանրապետության տարածքում գտնվող հնագիտական ժառանգության պահպանությանը, ենթակառուցվածքների զարգացմանը, հանրահռչակմանը, ինչպես նաև երկրի կայուն զարգացման գործընթացներում հնագիտական ժառանգության` որպես տնտեսական ռեսուրսի դիտարկմանը նպաստելը:
Ծրագրով նախատեսվում է 22 միջոցառումների կատարում, որոնք իրենց մեջ ներառում են հնագիտական հուշարձանների պեղումների ընդլայնում, վերականգնում, բարեկարգում, հանրահռչակում, ՅՈՒՆԵՍԿՕ-ի համաշխարհային ժառանգության ցանկում հնագիտական հուշարձանների ընդգրկում, նոր ենթակառուցվածքների ստեղծում, ինչպես նաև Հայաստանում հնագիտական զբոսաշրջության ուղղության ներդնում` մասնավորապես ամառային միջազգային հնագիտական ճամբարների անցկացում, հնագիտական զբոսաշրջության ցուցահանդես-տոնավաճառների կազմակերպում և անցկացում, երկրագիտական թանգարանների նոր մշտական ցուցադրությունների հայեցակարգերի մշակում:
Ծրագրով նախատեսված միջոցառումների իրականացումը կնպաստի հնագիտական վայրերի պահպանությանը, զարգացմանն ու հանրահռչակմանը, հանրապետությունում նոր զբոսաշրջային երթուղիների մշակմանը, այդ երթուղիներում հնագիտական հուշարձանների ընդգրկմանը, Հայաստանի զբոսաշրջային ակտիվ սեզոնի երկարաձգմանը, զբոսաշրջային այցելությունների դինամիկ աճին, ներքին զբոսաշրջության զարգացմանը, ինչպես նաև մի շարք համայնքների սոցիալ-տնտեսական խնդիրների լուծմանը, բնակչության որոշակի հատվածի զբաղվածության ապահովմանը:
Ծրագրի իրականացումը նախատեսվում է շահագրգիռ կողմերի` պետական կառավարման, տեղական ինքնակառավարման մարմինների, հասարակական և միջազգային կազմակերպությունների համագործակցությամբ:
