16.06.2026 | 20:34
Հայկական ակումբների մրցակիցները Կոնֆերենցիաների լիգայի որակավորման առաջին փուլում
Պաշտոնանկությունների շքերթ չկա. վարչապետի խոսնակը՝ աշխատանքից ազատվածների և առաջիկայում ազատվողների մասին
Քաղաքականություն
03.04.2019 | 12:06
Պաշտոնանկությունների շքերթ բացարձակ չկա: Այս մասին Factor.am-ի հետ զրույցում ասաց ՀՀ վարչապետի մամուլի խոսնակ Վլադիմիր Կարապետյանը՝ պատասխանելով հարցին, թե ինչո՞ւ են վարչապետի աշխատակազմի աշխատակիցներն ազատվում աշխատանքից:
Երեկ գրել էինք, որ Ալեքսանդր Մխիթարյանն ազատվել է վարչապետի արարողակարգի պատասխանատուի պաշտոնից, Արթուր Սարգսյանը՝ վարչապետի աշխատակազմի ղեկավարի առաջին տեղակալի պաշտոնից, Մարգարիտ Ազարյանը՝ աշխատակազմի կադրերի և անձնակազմի կառավարման վարչության պետի պաշտոնից: Ի դեպ՝ նշենք, որ Մարգարիտ Ազարյանն ԱԱԾ տնօրեն Արթուր Վանեցյանի մայրն է:
«Արարողակարգի աշխատակիցը տեղափոխվել է պետական արարողակարգի ծառայություն, իսկ մյուս երկուսի վերաբերյալ օրենքի սահմաններում, հղումներ անելով համապատասխան կարգավորումների վրա, որոշում է կայացվել»,- ասաց Վլադիմիր Կարապետյանը:
Լրատվամիջոցների տեղեկությունները, որ առաջիկայում աշխատանքից ազատվելու են նաև վարչապետի աշխատակազմի իրավաբանական վարչության պետ Հայկ Մալխասյանն ու Ազգային ժողովի հետ կապերի վարչության պետ Ամալյա Ենգոյանը, Վլադիմիր Կարապետյանը չմեկնաբանեց. «Ես չեմ կարող այս պահին մեկնաբանել նման տեղեկությունները»:
Նարեկ Կիրակոսյան
