Մենք առաջարկում ենք այնպիսի կառուցվածք, որտեղ վարչապետին ենթակա մարմիններ չեն լինի. ԼՀԿ-ն Կառավարության նոր կառուցվածք է առաջարկում. ՏԵՍԱՆՅՈՒԹ

Ազգային ժողովի «Լուսավոր Հայաստան» խմբակցությունն առաջարկում է Կառավարության կառուցվածքի փոփոխությունների իր նախագիծը: ԱԺ-ում հրավիրված ասուլիսում խմբակցության ղեկավար Էդմոն Մարուքյանը հայտարարեց, որ իրենց նախագծով Կառավարությունն ունենալու է 14 նախարարություն:

«Կառավարությունն արդեն հաստատել է կառուցվածքի փոփոխությունների նախագիծը: Այդ նախագծով առաջարկվում է կրճատել նախարարությունները, բայց, մեր կարծիքով, այդ կրճատումներն ունեն տեխնիկական բնույթ: Ցույց են տալու, որ նախարարությունների թիվը քիչ է, բայց էական փոփոխություն չկա»,- ասաց նա:

Էդմոն Մարուքյանը Կառավարության առաջարկած նախագծի հետ կապված երեք հարց է առաջ քաշում: Մասնավորապես՝ արդյո՞ք այդ փոփոխված տարբերակով սուպերվարչապետությունը վերացվում է, արդյո՞ք նրանք դառնում են խորհրդարանին հաշվետու և հնարավո՞ր է այդ փոփոխություններով լուծել բոլոր խնդիրները. «Մենք առաջարկում ենք այնպիսի կառուցվածք, որտեղ վարչապետին ենթակա մարմիններ չեն լինում, բոլորի համար կլինեն քաղաքական պատասխանատուներ»:

Անդրադառնալով հարցին, որ Կառավարությունն առաջարկում է սփյուռքի նախարարությանը կրճատելուն զուգահեռ՝ ստեղծել այլ մարմին, որը լինելու է վարչապետին կից, պատգամավորը նշեց, որ այն դուրս է մնում խորհրդարանին հաշվետու լինելուց: «Մենք առաջարկում ենք փոխվարչապետերից մեկին կցել, որ հայրենադարձության և սփյուռքի հարցերով զբաղվի: Այսպիսով հաշվետու կլինեն, քանի որ փոխվարչապետերը գալիս են խորհրդարան»,- ասաց նա՝ հավելելով, որ իրենց տարբերակով պահպանվում են երեք փոխվարչապետի պորտֆելները:

Մանրամասները՝ տեսանյութում:

Նարեկ Կիրակոսյան