05.11.2024 | 14:50
Վրաստանում 30 տեղամասերում ընտրությունների արդյունքները չեղարկվել են
Երևանի բյուջեն 10 մլրդ դրամով կավելանա․ ինչի՞ վրա են ծախսվելու երևանցիների գումարները. ՏԵՍԱՆՅՈՒԹ
Քաղաքականություն
22.03.2019 | 19:38
Այսօրվա ավագանու արտահերթ նիստում Երևանի 2019 թվականի բյուջեն 10 մլրդ դրամով ավելացնելու որոշումը ձայների մեծամասնությամբ ընդունվեց։ Քվեարկությանը չմասնակցեց միայն «Լույս» խմբակցությունը։
Բյուջեում ավելացող գումարների մեծ մասը կուղղվի մանկապարտեզներին։ Որի արդյունքում մանկապարտեզների աշխատակիցների, այդ թվում տեխնիկական անձնակազմի, աշխատավարձերը մոտ 20%-ով կավելանա։ Այս նպատակով կհատկացվի շուրջ 1 մլրդ դրամ:
Մանկապարտեզ հաճախել ցանկացող 1000 երեխաների համար նոր խմբեր կստեղծվեն։
Փոխքաղաքապետ Հայկ Սարգսյանը թվարկեց, թե էլ ինչ փոփոխություններ կլինեն նոր նախագծով․ «38 միլիոն կտրամադրվի մետրոյի նոր նախագծի, ճոպանուղու փաստաթղթերի կազմման համար։ 90 միլիոն կհատկացվի Երևանի հատակագծի մշակմանը, որը իրենից կներկայացնի մնիչև 2030 թվականը քաղաքի զարգացման հեռանկարը»։
415 միլիոն դրամով կավելացվի ստորգետնյա հետիոտնային անցումների վերանորոգման ծախսերը։ Հրազդանի կիրճի բարելավման համար կհաստակցվի 2 միլիոն դրամ։ Վերելակների բարեկարգմանն ուղղված ծախսերը ևս կավելանան՝ 90 միլիոն դրամով։ Շուրջ 190 մլն դրամ կհատկացվի ճարտարապետական նշանակության շենքերի ճակատների վերականգնմանը, 105 մլն դրամ 3-րդ կարգի վթարային շենքերի ամրացմանը:
Նախագծով նախատեսվում է հիմնանորոգել թատրոններ, մարզադպրոցներ, ձեռք բերել նորագույն բուժսարքավորումներ։ Փոխքաղաքապետը թվարկեց փոփոխությունները, բայց ընդդիմությանը դա չգոհացրեց։
Ավագանու ընդդիմադիր «Լույս» խմբակցության ղեկավար Դավիթ Խաժակյանը պնդեց, միևնույնն է, 2019 թվականի բյուջեն շարունակում է մնալ «անդեմ»:
Ավագանու այսօրվա նիստում «Լույս» խմբակցության անդամ Անի Խաչատրյանը առաջարկեց Երևանում գործող Իրինա Ռոդնինայի անվան գեղասահքի դպրոցը կոչել «Հայ-ռուսական դպրոց»։ Ավագանու նիստի ավարտին այս հարցի շուրջ կրքերը թեժացան։ Հարցի վերաբերյալ, սակայն վերջնական որոշում դեռ չկա։ Խմբակցություններում այն դեռ պետք է քննարկեն։
Մանրամասները՝ տեսանյութում։
Լիլիթ Շաբոյան
