Դժգոհ եմ այդ պրոցեսի ծավալներից. Փաշինյանը՝ կոռուպցիոներներից միլիարդները բանակին փոխանցելու մասին. ՏԵՍԱՆՅՈՒԹ

Նախորդ տարվա դեկտեմբերին Ազգային ժողովի քարոզարշավի ժամանակ Նիկոլ Փաշինյանն, անդրադառնալով կոռուպցիոն բացահայտումներին, հայտարարել էր, որ առաջիկա 5 տարիների ընթացքում խնդիր են դրել ԶՈւ կարիքների համար ծախսել հավելյալ 2․5 միլիարդ դոլար:

«Այդ 2․5 մլրդ դոլարը պետք է վճարեն մեզ հայտնի կոռուպցիոներները: Եթե նրանք դա անեն կամավոր, բոլորս դա հաշվի կառնենք, բայց սա չի նշանակում, որ դա ամբողջ թալանված գումարի չափն է»,- ասել էր նա:

Այսօր հրավիրված մամուլի ասուլիսի ժամանակ Factor.am-ը վարչապետ Նիկոլ Փաշինյանից հետաքրրքվեց, թե՞ որքան գումար են կարողացել այդ ճանապարհով այս չորս ամիսներին ուղղել բանակին: Միաժամանակ Փաշինյանից հետաքրքրվեցինք, թե ինչու՞ իրավապահ համակարգը հետեւողական չէ իր այն հայտարարություններին, որ նախկին իշխանությունների ժամանակ գործարարները ճամպրուկներով փողեր են տարել Բաղրամյան 26: Վարչապետից հետաքրքրվեցինք, թե ի վերջո ինչու՞ չպարզվեց, թե այդ գումարները պարտադրաբար էին տանում, թե՞ ոչ: Ում էին տալիս եւ ինչու:

«ՀՀ-ում կոռուցպիա է եղել, նախկին իշխանությունը կոռումպացված է եղել: Կոռուպցիան երբեմն եղել է ճամպրուկով, երբեմն՝ փոխանցումով: Հարցնում են՝ Սերժ Սարգսյանն ինչու՞ նստած չէ, որովհետեւ ես չեմ որոշողը: Քրեական գործի քննությունն է որոշողը՝ ով նստի, ով՝ չնստի»,- ասաց նա:

Նիկոլ Փաշինյանը նշեց, որ դժգոհ է բանակին կոռուպցիոներներից փոխանցվող գումարների գործընթացից:

Մանրամասները՝ տեսանյութում:

Նարեկ Կիրակոսյան