Հասարակություն
14.03.2019 | 20:30Երևան քաղաքի ընդհանուր իրավասության դատարանը՝ դատավոր Արմեն Բեկշթայանի նախագահությամբ, քիչ առաջ հեռացավ խորհրդակցական սենյակ՝ Ռոբերտ Քոչարյանի խափանման միջոցի վերաբերյալ որոշում կայացնելու: Լրագրողների հետ զրույցում Քոչարյանի պաշտպաններից Հայկ Ալումյանն ասաց, որ դատարանը որոշումը կհրապարակի վաղը՝ մարտի 15-ին ժամը 15:00-ին:
Հիշեցնենք, որ դատարանը երկու օր քննեց Քոչարյանի կալանքը ևս երկու ամսով երկարաձգելու մասին նախաքննական մարմնի միջնորդությունը: Այսօրվա նիստին մասնակցում էր նաև Ռոբերտ Քոչարյանը, որը բավական երկար բացատրություն է տվել՝ մոտ 40 րոպե:
«Մանրամասն ներկայացրեց, թե ինչ է տեղի ունեցել փետրվարի 19-ից սկսած՝ մինչև մարտի 2-ը: Ես պարոն Քոչարյանի փոխարեն հիմա մանրամասներ չեմ ներկայացնի: Մինչև հիմա մենք ինչ բարձրաձայնել ենք, նույն բաներն են՝ արդեն իր տեսանկյունից՝ առաջին դեմքից»,- ասաց Ալումյանը:
Հարցին, թե առաջադրված նոր մեղադրանքի՝ կաշառքի վերաբերյալ Ռոբերտ Քոչարյանը որևէ հայտարարություն արե՞ց, պաշտպանը դրական պատասխանեց՝ հավելելով. «Բացարձակ անհիմն մեղադրանք է, մենք այդ նյութերը վերլուծեցինք, որի հիման վրա նախաքննական մարմինը փորձում է ցույց տալ, թե կա հիմնավոր կասկած, կա ողջամիտ կասկած, որ այդպիս դեպք է տեղի ունեցել, մանրամասն վերլուծվեց դա»,- ասաց նա:
Լրագրողի հարցին՝ Ռոբերտ Քոչարյանն ի՞նչ ասաց կաշառքի վերաբերյալ, պաշտպանը պատասխանեց. «Ասաց, որ դա բացարձակապես իրականությանը չի համապատասխանում, այդպիսի բան լինել չէր կարող»:
Հիշեցնենք, որ ՀՀ երկրորդ նախագահ Ռոբերտ Քոչարյանը մեղադրվում է 2008 թվականի Մարտի 1-ի դեպքերի ժամանակ սահմանադրական կարգը տապալելու համար: Նա դեկտեմբերի 7-ից անազատության մեջ է:
Լիլիթ Շաբոյան
