«Տապալվելը խիստ հարաբերական է». «Ելք»-ի պատգամավորը` ԵՏՄ-ից դուրս գալու առաջարկի իրականացման մասին

 ԱԺ «Ելք» խմբակցության պատգամավոր Մանե Թանդիլյանը Factor.am-ի հետ զրույցում, անդրադառնալով ԵՏՄ-ից դուրս գալու առաջարկի առթիվ քաղաքական աջակցություն չունենալու հարցին, ասում է, որ ««Ելք»-ն անհրաժեշտություն չունի սպասել որևէ լրացուցիչ ուժի, որ որևէ քայլ անի, որովհետև ինքն արդեն ունի քաղաքական այն սատարումն ու մանդատը, որ կարողանա քաղաքական օրակարգ բերել այնպիսի հարցեր, որոնք անհրաժեշտ են ՀՀ-ին»:

Թանդիլյանի խոսքով՝ դաշինքը դեռ քննարկում է ԵՏՄ-ից դուրս գալու հարցը, սակայն ««Ելք»-ի բոլոր քաղաքական ուժերը իրենց բացասական դիրքորոշումը հայտնել են ԵՏՄ մտնելու առթիվ, և Էդմոն Մարուքյանն ու Նիկոլ Փաշինյանը, որոնք պատգամավոր են եղել ԵՏՄ մտնելու ժամանակ, դեմ են քվեարկել այդ նախաձեռնությանը»:

«Ըստ էության, մեր դիրքորոշումը որպես այդպիսին ակնհայտ է ԵՏՄ-ին Հայաստանի մասնակցության մասին: Որոշ ռուսական քաղաքագետներ, բնական է, որ պետք է դա դեմագոգիա որակեն և շատ արագ անհանգստանան: Հենց այն, որ որոշ ռուսական քաղաքագետներ անհանգստություն են ցուցաբերում, նշանակում է՝ սա արժեք ունի և տեղ ունի լինելու և քննարկման առարկա դարձվելու»,- ասաց Թանդիլյանը՝ շարունակելով. «ԵՏՄ շրջանակներում ամեն օր ոտնահարվում են Հայաստանի ու ՀՀ քաղաքացիների շահերը»:

Հարցին` արդյո՞ք առանց այլ ընդդիմադիր ուժերի աջակցության, «Ելք»-ը կարող է իրականացնել ԵՏՄ-ից դուրս գալու նախաձեռնությունը: ««Ելք»-ն ունի հանրության սատարումը, դա է կարևորը»,- ընդգծեց պատգամավորը: Սակայն, ըստ նրա, իրենք դեմ չեն համագործակցությանը. «Ինքնաբավներն էլ են համագործակցում»: Անգամ եթե նախաձեռնությունը տապալվի ԱԺ-ում, «Ելք»-ի ներկայացուցիչը չի համարում, որ խմբակցությունը չպետք է հանդես գա նման նախաձեռնությամբ. «Որովհետև հանրության պաշտպանության կարիքն ունի «Ելք»-ի նախաձեռնությունը, այլ ոչ թե ՀՀԿ-ական իշխանության: Տապալվելը խիստ հարաբերական է և յուրաքանչյուր իրավիճակից կարելի է քաղել քաղաքական օգուտներ: Դիրքավորումը ցույց կտա, որ Հայաստանը անողնաշար պետություն չէ»:

Մանրամասները դիտեք Factor.am-ի հետ ԱԺ «Ելք» խմբակցության պատգամավոր Մանե Թանդիլյանի հարցազրույցում:

Մարինե Խառատյան