Տնտեսություն
14.03.2019 | 10:57Մեր պետտուրքերն ավելացնելով՝ ոչ թե տնտեսությունն են բարելավում, այլ մոնոպոլիզացնում են: Այս մասին «Պետական տուրքի մասին ՀՀ օրենքում փոփոխություններ և լրացումներ կատարելու մասին» նախագծով սպասվող փոփոխությունների դեմ բողոքի ակցիայի ժամանակ ասաց գրավատան աշխատակից Աշոտ Մանուկյանը:
«Չեմ ուզում մեղադրել, բայց մտածում եմ, որ երկար տարիներ «Արդշինբանկի» վերին օղակներում աշխատած փոխվարչապետ Մհեր Գրիգորյանը լոբբինգ է անում: Վարչապետն ամեն օր ասում է, որ սա ժողովրդի Կառավարությունն է։ Դե թող գան, մեզ լսեն ու հասկանան։ Մեզ իրենց կարծիքն է հետաքրքրիր»,- ասաց Աշոտ Մանուկյանը։
Նրա խոսքով՝ դաշտն անհավասար է. «Եթե այդպես է, բանկի պետական տուրքը պետք է լինի 20 մլն, ոչ թե 3 մլն»:
Հիշեցնենք, որ Կառավարության շենքի դիմաց ընթանում է «Պետական տուրքի մասին ՀՀ օրենքում փոփոխություններ և լրացումներ կատարելու մասին» նախագծով սպասվող փոփոխությունների դեմ բողոքի ակցիան։ Ակցիայի մասնակիցների պնդմամբ՝ Կառավարությունը պատրաստվում է 60 անգամ ավելացնել նշված ոլորտների պետական տուրքը, ըստ որի՝ գրավատների համար ներկայիս 100.000 դրամի փոխարեն կսահմանվի 6 միլիոն, իսկ փոխանակման կետերի համար՝ 50.000-ի փոխարեն՝ 3 միլիոն դրամ պետական տուրք:
Արդյունքում, ըստ նրանց, ՀՀ-ում գործազրկությունը կաճի, ավելի քան 1.300 աշխատակից՝ մարզերում և Երևանում գործազուրկ կմնա, տարեկան ավելի քան 900 միլիոն դրամ հարկ չի վճարվի պետական բյուջե և ոլորտում կարմատանա մենաշնորհը: Նրանք առաջարկում են պետական տուրքի չափն անփոփոխ թողնել, անգամ՝ նվազեցնել:
Մանրամասները՝ տեսանյութում:
Նելլի Մելքոնյան
