Տնտեսություն
14.03.2019 | 10:46Մենք չենք պատրաստվում փակվել, մենք պատրաստվում ենք մեր ձայնն ավելի լսելի դարձնել, համոզված ենք, որ եթե մեր բողոքը հասնի վարչապետին, օրենքն ուղղակի չի կարող ընդունվել: Այս մասին լրագրողների հետ զրույցում նշեցին «Պետական տուրքի մասին ՀՀ օրենքում փոփոխություններ և լրացումներ կատարելու մասին» նախագծով սպասվող փոփոխությունների դեմ գրավատների աշխատակիցների նախաձեռնած բողոքի ակցիայի մասնակիցները:
«Ըստ նախագծի՝ բանկերն ընդամենը 350.000 դրամ պետտուրք են վճարում, իսկ գրավատները՝ 6 մլն: Այս հաշվարկի մեջ ոչ մի տրամաբանություն չկա»,- նշեց Գրավատների միության նախագահ Հրանտ Նալբանդյանը:
Ըստ նրա՝ օրենքի ընդունման դեպքում բնակչության այն հատվածը, որն օգտվում է գրավատնային ծառայություններից և գործ ունի փոքր գումարների հետ, պարզապես դուրս կմղվի:
«Գրավատանը վարկառուն մինչև 100.000 դրամի մեկօրյա գրավի դիմաց 100-300 դրամ է վճարում, իսկ բանկերի դեպքում՝ մինչև 2.000 դրամ»,- ընդգծեց Նալբանդյանը։
Գրավատան աշխատակից Արտակ Պողոսյանն էլ նշեց՝ տպավորություն է, որ հեղափոխությունից առաջ կատարվածը նաև հիմա է կրկնվում. «Կա՞ օրենք, որը կարգավորում է այն հարցը, թե դրույքաչափերը որքան կարող են բարձրացնել: Դեռ մի կերպ դիմանում ենք: Տպավորություն է, որ ինչ հեղափոխությունից առաջ էր կատարվում, այժմ կրկնվում է՝ ուրիշի ձեռքով և ավելի վատ ձևով»։
Հիշեցնենք, որ Կառավարության շենքի դիմաց ընթանում է «Պետական տուրքի մասին ՀՀ օրենքում փոփոխություններ և լրացումներ կատարելու մասին» նախագծով սպասվող փոփոխությունների դեմ բողոքի ակցիան: Ակցիայի մասնակիցների պնդմամբ՝ Կառավարությունը պատրաստվում է 60 անգամ ավելացնել նշված ոլորտների պետական տուրքը, ըստ որի՝ գրավատների համար ներկայիս 100.000 դրամի փոխարեն կսահմանվի 6 միլիոն, իսկ փոխանակման կետերի համար՝ 50.000-ի փոխարեն՝ 3 միլիոն դրամ պետական տուրք:
Մանրամասները՝ տեսանյութում:
Նելլի Մելքոնյան
