09.03.2026 | 21:57
Զելենսկին հայտարարել է, որ Իրանի հարևան երկրներից ԱԹՍ-ների դեմ պայքարի հարցում օգնության 11 դիմում է ստացվել
Չհայտարարված այց Երևանի կայազորային հոսպիտալ. ՄԻՊ-ի աջակցությամբ զինծառայողին լրացուցիչ կհետազոտեն
Հասարակություն
13.03.2019 | 10:21
ՄԻՊ աշխատակազմից տեղեկացնում են, որ պարտադիր ժամկետային զինծառայողի մայրը Մարդու իրավունքների պաշտպանին խնդրել է աջակցել որդուն լրացուցիչ հետազոտելու հարցում:
Նա Պաշտպանին հասցեագրած բողոքով տեղեկացրել է, որ որդին ունի որոշակի առողջական խնդիրներ, ինչի կապակցությամբ ստացիոնար բուժման է ընդունվել Պաշտպանության նախարարության Երևանի կայազորային հոսպիտալ: Բողոք ներկայացրած անձի պնդմամբ՝ հոսպիտալում իրականացված հետազոտությունները բավարար չեն եղել որդու առողջական վիճակը պարզելու նպատակով:
Բողոքի ուսումնասիրության շրջանակում Մարդու իրավունքների պաշտպանի ներկայացուցիչները չհայտարարված այց են իրականացրել Պաշտպանության նախարարության Երևանի կայազորային հոսպիտալ:
Այցի ընթացքում Պաշտպանի ներկայացուցիչները հանդիպել են հոսպիտալի ղեկավար անձնակազմի, զինծառայողին բուժող բժշկի հետ, ուսումնասիրել զինծառայողի բժշկական փաստաթղթերը, առանձնազրույց ունեցել զինծառայողի հետ:
Արդյունքում պարզվել է, որ զինծառայողի առողջական վիճակը պարզելու նպատակով հոսպիտալում իրականացվել են անհրաժեշտ հետազոտություններ, սակայն Պաշտպանի աշխատակազմի ներկայացուցիչների և հոսպիտալի ղեկավար անձնակազմի համատեղ քննարկման արդյունքում զինծառայողի առողջական վիճակի վերաբերյալ առավել ամբողջական տվյալներ ստանալու նպատակով որոշում է կայացվել իրականացնել լրացուցիչ հետազոտություն:
Մարդու իրավունքների պաշտպանը կարևորում է զինծառայողների իրավունքների ապահովման և ամրապնդման ոլորտում ՀՀ պաշտպանության նախարարության հետ ձևավորված արդյունավետ և կայուն համագործակցությունը:
