Հայաստան գազի տարանցման հարցով Վրաստանի և «Գազպրոմ»-ի բանակցություններն ավարտվել են. Մամուկա Բախտաձե

Վրաստանի Էկոնոմիկայի և կայուն զարգացման նախարարության բանակցությունները ռուսական «Գազպրոմ» ընկերության հետ ավարտվել են։ Այս մասին հայտարարել է Վրաստանի վարչապետ Մամուկա Բախտաձեն, հայտնում է «Սպուտնիկ Գրուզիա»-ն:

Վրաստանը «Գազպրոմ»-ի հետ բանակցություններ էր վարում՝ Վրաստանի տարածքով դեպի Հայաստան գազի տարանցման հարցով: Բախտաձեն ասել է, որ ռուսական «Գազպրոմ»-ի հետ նոր համաձայնագրում հաշվի են առնվել վրացական կողմի շահերը:

«Բանակցությունները, փաստորեն, ավարտված են: Ուզում եմ հիշեցնել, թե բանակցությունների ժամանակ ինչ սկզբունքներով է ղեկավարվել Էկոնոմիկայի նախարարությունը: Առաջինը, անշուշտ, մեր էներգետիկ անկախությունն է, իսկ երկրորդը՝ այս պայմանագրում մեր դիրքի բարելավումը: Բանակցություններն ավարտին են հասցվել՝ ամբողջությամբ հաշվի առնվելով այս սկզբունքները»,- ընդգծել է Բախտաձեն:

«Գազպրոմ»-ի հետ Վրաստանը վերջին անգամ պայմանագիր է կնքել 2017 թվականին: Այն երկու տարի ժամկետով էր և նոր պայմաններ էր նախատեսում, ըստ որոնց՝ առաջին տարում բնական գազի տարանցման դիմաց տրվող գումարը Վրաստանը մաս-մաս պետք է ստանար, իսկ երկրորդ տարում՝ փոխհատուցումն ամբողջությամբ պետք է դրամային արտահայտություն ունենար. մինչ այդ վրացական կողմը բացառապես գազով էր փոխհատուցում ստանում:

Հիշեցնենք, որ Վրաստանը ռուսական գազ չի գնում 2017 թվականից: Երկրի բնական գազի պահանջարկը բավարարում է Ադրբեջանը:

2018 թվականին Վրաստանի տարածքով Հայաստան է տարանցվել 1.93 մլրդ խորանարդ մետր գազ, 2017-ին՝ շուրջ 2 մլրդ: Ռուսաստանի և Հայաստանի միջև պայմանագիրը նախատեսում է մինչև 2.5 մլրդ խորանարդ մետր գազի մատարակարարում:

Նելլի Մելքոնյան