Քաղաքականություն
12.03.2019 | 12:15Կառավարության ծրագրի վերաբերյալ Հայ Յեղափոխական Դաշնակցությունը հանդես է եկել ծավալուն անդրադարձով և ներկայացրել կուսակցության մտահոգություններն առաջարկվող փոփոխությունների վերաբերյալ․ դրանցից մեկը վերաբերում է Կառավարության օպտիմալացմանն ու գործադիրի աշխատանքի արդյունավետության բարձրացմանն ուղղված քայլերին. այս մասին այսօր հրավիրված մամուլի ասուլիսի ժամանակ ասաց ՀՀ գյուղատնտեսության նախկին նախարար Արթուր Խաչատրյանը։
«Կառավարության ծրագրի առաջին նախադասությունը, երբ կարդում ես, հասկանում ես, որ 17 նախարարի հետ աշխատելը դժվար էր, դրա համար դարձնում են 12։ Կառավարության արդյունավետության աստիճանի, դրա բարձրացման մասին որևէ տող ես Կառավարության ծրագրում չկարդացի։ Ինչպե՞ս են չափելու այդ արդյունավետությունը, գրված չէ։ Որևէ գերատեսչության գործառույթների հստակեցման մասին որևէ բառ այս ծրագրում գրված չէ»,- ասաց Խաչատրյանը։
Վերջինիս խոսքով՝ հստակեցված չէ նաև հաստիքների կրճատման անհրաժեշտությունը: «Եթե մենք այդ հաստիքները կրճատենք, միևնույնն է՝ Կառավարության արդյունավետությունը չի բարձրանա դրանից․ այո՛, փող կխնայենք, բայց արդյունքի չենք հասնի»,- ասաց Խաչատրյանը՝ ընդգծելով, որ գործող Կառավարությունը ժանտախտի նման հեռու է փախչում ցանկացած չափելիությունից։
Նախկին նախարարն անընդունելի է համարում նաև նախարարությունների միավորումը․ չի հասկանում՝ ի՞նչ կապ ունեն գյուղատնտեսության և էկոնոմիկայի նախարարություններն իրար հետ և ինչո՞ւ չի քննարկվել, օրինակ, էկոնոմիկայի և ֆինանսների նախարարությունների միավորման հարցը։
«Ո՞րն է այդ միավորման բազան, դա էլ չկա։ Մեզ մոտ այդ տրամաբանական հենքը ես չեմ տեսել»,- ասաց նախկին նախարարը՝ հարցադրում հնչեցնելով գուցե այդ օպտիմալացման արդյունքում խնայվում են գումարներ, որ 105 պատգամավորի փոխարեն 132 պատգամավո՞ր պահեն։
Արթուր Խաչատրյանի համոզմամբ՝ անհասկանալի է, թե ինչ է լինելու պետական ապարատից կրճատված 10 000 ՀՀ քաղաքացիների ճակատագիրը։
«Էդ կրճատված 10 000 քաղաքացիների հետ ի՞նչ ենք անելու․ տոմս ենք առնելու, ասենք՝ գնա Չուկոտկա, մեզ մի խանգարի՞, վերապատրաստման դասընթացնե՞ր ենք կազմակերպելու, նպաստնե՞ր ենք տալու, որը խժռելու է այդ խնայողությունները: Ինչ ենք անելու նրանց հետ, դեռ հայտնի չէ»,- նշեց նախկին նախարարը։
Մանրամասները՝ տեսանյութում։
Աղավնի Սուքիասյան
