02.07.2026 | 16:32
ՔԿ-ն մանրամասներ է հայտնում գնդապետ Էդիկ Մալոյանի ձերբակալությունից
ՆԱՏՕ-ն հայտնի է միայն Հայաստանի փորձագետների նեղ շրջանում. Մաթիաս Քիսլեր. ՏԵՍԱՆՅՈՒԹ
Քաղաքականություն
11.03.2019 | 11:46
«Ուզում եմ իմ երախտագիտությունը հայտնել այն բանի կապակցությամբ, որ ՆԱՏՕ-ի հետ «Անհատական գործընկերության գործողությունների ծրագիրը» և քաղաքական երկխոսության ընթացքի ու զարգացման ուղղությունները բացահայտորեն ընդգրկված են Հայաստանի կառավարության ծրագրում»,- Հայաստանում «ՆԱՏՕ-ի շաբաթվա» միջոցառումների սկիզբն ազդարարող մամուլի ասուլիսում հայտարարեց Հայաստանում Գերմանիայի արտակարգ և լիազոր դեսպան Մաթիաս Քիսլերը։
Նախատեսված միջոցառումներից պարոն դեսպանն առանձնացրեց հատկապես երեքը, որոնցից առաջինը նվիրված կլինի Զինված ուժերում քաղաքացիական, խորհրդարանական վերահսկողությանը․ «Քանի որ Հայաստանն անցում կատարեց կիսանախագահական կառավարման համակարգից խորհրդարանականի, փաստորեն, հիմա խորհրդարանը նշված ուղղությամբ ավելի մեծ պատասխանատվություն է կրելու, և դա վերաբերվում է նաև քաղհասարակությանը։ Որքան էլ սա դրական լինի, նորընտիր որոշ խորհրդարանականների համար սա մարտահրավեր է հանդիսանալու»։
Մաթիաս Քիսլերը կարևորեց նաև «Կանանց անվտանգությանը և խաղաղությանը նվիրված» թեմայով քննարկումը և բարեվարքության թեմայով սեմինարը։ Պարոն դեսպանի խոսքով՝ անհրաժեշտ է այս միջոցառումներին ներգրավվել մեծաթիվ հայաստանցիների: «Դժբախտաբար, իմ տպավորությունն այն է, և ես սա ասում եմ հասարակ ժողովրդի հետ խոսելուց ստացված իմ տպավորությունից՝ ՆԱՏՕ-ն հայտնի է միայն Հայաստանի փորձագետների նեղ շրջանում։ Ուստի ոչ միայն կարևոր է ՆԱՏՕ-ի շաբաթվա ընթացքում ապահովել մասնագետների ու փորձագետների միջև քննարկումները, այլ նաև հնարավորինս շատ ներգրավել լայն հասարակությանը»,- ասաց Մաթիաս Քիսլերը։
Նշենք, որ Հայաստանում Գերմանիայի դեսպանատունը ՆԱՏՕ-ի կապի հիմնական հաստատությունն է՝ սկսած 2015 թվականից։
Հավելենք, որ այսօր Հայաստան է ժամանել ՆԱՏՕ-ի ընդհանուր քարտուղարի հատուկ ներկայացուցիչ Ջեյմս Ապաթուրայը, որը ժամը 18։00-ին հանդես է գալու մամուլի ասուլիսով։
Ռոբերտ Անանյան
