02.07.2026 | 12:36
ՌԴ-ն Ուկրաինայի դեմ 74 հրթիռ և շուրջ 500 ԱԹՍ է կիրառել․ Կիևում զոհերի թիվը հասել է 13-ի
Վերջին շրջանում երիտասարդացել է հատկապես վահանաձև գեղձի քաղցկեղը․ Խաչանուշ Հակոբյան
Հասարակություն
08.03.2019 | 16:52
Հայաստանում կանանց շրջանում հաճախ հանդիպող հիվանդություններից են կրծքագեղձի և արգանդի պարանոցի քաղցկեղը, իսկ վահանաձև գեղձը ներզատական համակարգի բաղկացուցիչ մասն է: Այս մասին այսօր հրավիրված մամուլի ասուլիսի ժամանակ ասաց Հայ-ամերիկյան առողջության կենտրոնի տնօրեն Խաչանուշ Հակոբյանը՝ նշելով, որ ներզատական համակարգը մեր ամբողջ օրգանիզմն է ղեկավարում և դրա համար ցանկալի է, որ մարդիկ ուշադրություն դարձնեն նաև այս օրգանի աշխատանքին և անպայման անցնեն վահանաձև գեղձի քաղցկեղի սքրինինգային ծրագիրը։
Ըստ Հակոբյանի՝ 2019 թվականին Հայ-ամերիկյան առողջության կենտրոնում կատարվել է վահանաձև գեղձի 334 հետազոտություն և 162-ի դեպքում խնդիրներ են նկատվել:
«Քաղցկեղի բուժմանն ուղղված ամենակարևոր քայլը կանխարգելումն է, այդ իսկ պատճառով քաղաքացիներին հիշեցնում ենք, որ նույնիսկ առանց գանգատի և առանց խնդրի պետք է դիմեն բժշկի քաղցկեղը կանխարգելելու համար: Այդ ժամանակ մենք կարողանում ենք հիվանդությունը հայտնաբերել նախաքաղցկեղային փուլում, այսինքն` հետազոտելով օրգանը, մենք գտնում ենք քաղցկեղը, երբ դեռ այն չի ձևավորվել և ոչ մի վտանգ չի սպառնում մարդուն: Մարդիկ չեն կարող զգալ, որ իրենց մոտ հասունանում է այդ չարիքը: Այս եղանակով մենք 9500 մարդու կյանք են կարողացել փրկել»,- ասաց նա՝ հավելելով, որ եթե մեր քաղաքացիները ավելի աչալուրջ լինեն, կկարողանան ավելի շուտ այդ հիվանդությունները հայտնաբերել նախաքաղցկեղային փուլում։
Աղավնի Սուքիասյան
