Հակակոռուպցիոն պայքարը պետք է իրականացնենք լիարժեք․ Նիկոլ Փաշինյան․ ՏԵՍԱՆՅՈՒԹ

Կառավարության այսօրվա նիստում գործադիրը հավանություն տվեց «Հանրային ծառայության մասին» օրենքում փոփոխություններ կատարելու մասին» օրենքի նախագծին:

Ըստ հարցի զեկուցող, արդարադատության նախարար Արտակ Զեյնալյանի՝  «Հանրային ծառայության մասին» 2018 թվականի օրենքում՝ գույքի, եկամուտների և շահերի հայտարարագրման կարգավորումները գրեթե ամբողջությամբ պայմանավորել են հանձնաժողովի կազմավորմամբ:

«Այս առումով, հարկ է նշել, որ հանձնաժողովը դեռևս չի կազմավորվել, և քանի որ հայտարարագրմանն առնչվող նորմերի ուժի մեջ մտնելը հիմնականում պայմանավորված էր տվյալ մարմնի ստեղծմամբ, փաստացի ստեղծվել է մի իրավիճակ, որի արդյունքում Բարձրաստիճան պաշտոնատար անձանց էթիկայի հանձնաժողովն իրավասու չէ ընդունելու պաշտոնատար անձանց և նրանց ընտանիքի անդամների կողմից ներկայացված հայտարարագրերը: Ընդ որում, հայտարարագրերի ներկայացման գործընթացի կասեցումը շատ լուրջ հետևանքներ կունենա ինչպես վարչական վարույթների և համապատասխան քրեական գործերի հարուցման, այնպես էլ միջազգային կազմակերպությունների գնահատման տեսանկյունից», – ասաց նախարարը՝ նշելով, որ նախատեսվող փոփոխություններով առաջարկվում է հայտարարագրման նոր կարգավորումների ուժի մեջ մտնելու ժամկետ նախատեսել 2020 թվականի հունվարի 1-ը:

«Խնդրում եմ նախագիծը համարել անհետաձգելի և քննարկել ԱԺ առաջիկա նիստերի ընթացքում: Ըստ էության, սրանով փորձ է արվում լուծել իրավական հնարավոր վակուումն ու բացը», – ասաց Արտակ Զեյնալյանը:

Հարցի վերաբերյալ Նիկոլ Փաշինյանը նկատեց, որ Կառավարությունը խնդիր ունի կողմնորոշվելու հետագա հակակոռուպցիոն ռազմավարության հարցում և հակակոռուպցիոն պայքարը պետք է լիարժեք իրականացվի:

Մանրամասները՝ տեսանյութում։

Աղավնի Սուքիասյան